𝐈𝐧𝐭𝐞𝐫𝐯𝐞𝐧𝐬𝐚𝐮𝐧 𝐒. 𝐄𝐱𝐚. 𝐌𝐢𝐧𝐢𝐬𝐭𝐫𝐮 𝐄𝐧𝐬𝐢𝐧𝐮 𝐒𝐮𝐩𝐞𝐫𝐢𝐨́𝐫, 𝐒𝐢𝐞́𝐧𝐬𝐢𝐚 𝐧𝐨 𝐊𝐮𝐥𝐭𝐮𝐫𝐚 𝐢𝐡𝐚 𝟓.ª 𝐒𝐞𝐫𝐢𝐦𝐨́𝐧𝐢𝐚 𝐆𝐫𝐚𝐝𝐮𝐚𝐬𝐚𝐮𝐧 𝐡𝐨𝐬𝐢 𝐈𝐧𝐬𝐭𝐢𝐭𝐮𝐭𝐮 𝐒𝐢𝐞́𝐧𝐬𝐢𝐚𝐬 𝐒𝐚𝐮́𝐝𝐞 (𝐈𝐂𝐒)

𝑬𝒙𝒆𝒍𝒆́𝒏𝒔𝒊𝒂 𝑴𝒆𝒎𝒃𝒓𝒖𝒔 𝑷𝒂𝒓𝒍𝒂𝒎𝒆𝒏𝒕𝒖 𝑵𝒂𝒔𝒊𝒐𝒏𝒂𝒍

𝑬𝒙𝒆𝒍𝒆́𝒏𝒔𝒊𝒂 𝑴𝒆𝒎𝒃𝒓𝒖𝒔 𝑮𝒐𝒗𝒆𝒓𝒏𝒖

𝑴𝒂𝒈𝒏𝒊́𝒇𝒊𝒌𝒖 𝑹𝒆𝒊𝒕𝒐́𝒓 𝑰𝒏𝒔𝒕𝒊𝒕𝒖𝒕𝒖 𝑺𝒊𝒆́𝒏𝒔𝒊𝒂𝒔 𝑺𝒂𝒖́𝒅𝒆

𝑺𝒆𝒏̃𝒐́𝒓𝒆𝒔 𝑫𝒊𝒓𝒊𝒋𝒆𝒏𝒕𝒆, 𝑫𝒐𝒔𝒆𝒏𝒕𝒆 𝒏𝒐 𝒆𝒔𝒕𝒖𝒅𝒂𝒏𝒕𝒆 𝒉𝒖𝒔𝒊 𝑰𝑪𝑺

𝑬𝒔𝒕𝒊𝒎𝒂𝒅𝒖𝒔 𝒆𝒔𝒕𝒖𝒅𝒂𝒏𝒕𝒆 𝑮𝒓𝒂𝒅𝒖𝒂𝒅𝒖 𝒔𝒊𝒓𝒂 𝒏𝒐 𝒇𝒂𝒎𝒊́𝒍𝒊𝒂

𝑺𝒆𝒏̃𝒐́𝒓𝒂𝒔 𝒏𝒐 𝑺𝒆𝒏̃𝒐́𝒓𝒆𝒔, 𝒎𝒂𝒌 𝒉𝒂́’𝒖 𝒓𝒆𝒔𝒑𝒆𝒊𝒕𝒖

Uluk nanain ha’u hakarak agradese no hateten katak, ne’e sai onra ida mai ha’u, nu’udar Ministru Ensinu Superiór, Siénsia no Kultura, hodi partisipa iha serimónia graduasaun ida-ne’e.

Ha’u hakarak hahú hodi kumprimenta partisipante hotu-hotu iha serimónia ida-ne’e, espesiál liu, ba Magnífiku Reitór Institutu Siénsias Saúde, Sr. Domingos Soares, no Institutu Siénsias Saúde nia Komunidade Akadémika tomak, hanesan Dirijente sira, Dosente no estudante sira iha institutu ida-ne’e.

Ha’u hakarak mós aprezenta saudasaun no fó parabéns ba estudante finalista sira, ne’ebé ohin simu graduasaun nomós ba sira-nia família ne’ebé mak marka prezensa iha serimónia ida-ne’e.Graduasaun nu’udar momentu importante ba instituisaun ensinu superiór ida nian, ida-ne’e signifika katak instiuisaun ida-ne’e hatene ona tau kondisaun, atu, iha tinan haat nia laran, ninia estudante sira, ohin bele gradua, aprende didi’ak no fó-resposta ne’ebé pozitivu tebes ba ezijénsia akadémika sira.

Nune’e, ha’u felisita Institutu Siénsias Saúde, liuliu ba Magnífiku Reitór, estrutura dirijente, dosente sira no funsionáriu hotu, ne’ebé halo servisu-makaas hodi ikusmai estudante ida-idak bele finaliza ninia perkursu akadémiku no ohin bele aprezenta iha graduasaun ida-ne’e.

𝑬𝒙𝒆𝒍𝒆́𝒏𝒔𝒊𝒂, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐́𝒓 𝒔𝒊𝒓𝒂 𝒎𝒂𝒌 𝒉𝒂’𝒖 𝒓𝒆𝒔𝒑𝒆𝒊𝒕𝒖

Bainhira ha’u partisipa iha serimónia graduasaun ida, ha’u sente konvensidu katak, juventude maka rikeza boot Timor-Leste nian. Notísia di’ak ne’e maihosi estudu demográfiku ne’ebé koñesidu tebes, hatudu katak maioria hosi ita-nia populasaun maka foinsa’e sira, tan ne’e, ita tenke otimista nafatin ba futuru ita-nia rai doben nian.

Maske maioria hosi ita-nia populasaun mak joven, sira hanesan rikeza potensiál de’it, ne’e signifika katak sira reprezenta de’it oportunidade ida, no la’ós garantia ba rikeza nomós futuru prósperu.

Nune’e, ita tenke iha konsiénsia katak atu ita transforma ita-nia foinsa’e sira-nia potensialidade hodi haforsa liután dezenvolvimentu Timor-Leste, ita presiza nafatin investi iha kualidade, relevánsia no empregabilidade ba kursu sira-ne’ebé atu fó ba ita-nia joven sira, hosi Instituisaun Ensinu Superiór públika no privada sira.

Kestaun ida ne’ebé relevante, no ita-nia país nomós ita-nia Instituisaun sira Ensinu Superiór públika no privada presiza konsidera maka, dezenvolvimentu ba kursu politékniku ka profisionalizante sira.

Oferta formativa ba ensinu superiór iha Timor-Leste, 95% hosi kursu baxarelatu no lisensiatura.

Kursu nível politékniku ne’ebé eziste – kursu orientandu ne’ebé fó prioridade liu ba insersaun iha merkadu-traballu – ne’e ituan liu, no ita iha de’it instiuisaun ensinu politékniku ida, ne’e maka Institutu Politékniku Betanu (IPB).

Ida-ne’e signifika katak ensinu ne’ebé lesiona iha ita-nia instituisaun sira ensinu superiór, ne’e, maioria haree liu ba situasaun, jenériku, abstratu no bazeia ba transmisaun konteúdu no la´ós ba akizisaun kompeténsia hosi parte estudante sira-nian.

Tamba preokupasaun ida-ne’e, no ho objetivu atu hadi’a artikulasaun entre edukasaun no dezenvolvimentu, ita estabelese ona iha Polítika Nasionál ba Ensinu Superiór, medida lubuk ida, ne’ebé ho objetivu atu fó konteúdu profisionalizante no vokasionál hodi transforma ensinu superiór.

Iha kontestu ida-ne’e, ita mós aprova ona, iha tinan ne’e, Dekretu-Lei kona-ba kuríkulu nasionál. Diploma legál ida, ne’ebé estabelese estrutura ba formasaun ensinu superiór, ne’ebé bazeia ka orientadu ba kompeténsia sira.

Maiór parte hosi país sira-ne’ebé dezenvolvidu ona iha Europa, Estadus Unidus no Ázia, país sira-ne’e aposta no tau duni interese bo’ot ba kursu sira iha área politéknika. Kursu sira-ne’e ho karatér prátiku liu, no orientadu atu hatán ba nesesidade merkadu-traballu nian.

Implementasaun kursu politékniku iha área prioritáriu sira, atu ita-nia país bele iha efeitu pozitivu, ne’ebé haree liuliu ba empregabilidade no reforsu kolaborasaun entre mundu akadémiku no ajente ekonómiku.

Kestaun ne’e urjente tebes, tambá ita-nia país, lakleur tan, sei halo-parte iha ASEAN. Ita tenke prepara kapasidade no kbi’it husi ita-nia foinsa’e sira, ho kompeténsia nesesária, atu, iha futuru, sira bele kompete ho joven hosi país sira ne’ebé avansadu tebes, liuliu iha dezenvolvimentu edukativu, ekonómiku no teknolójiku.

𝑬𝒙𝒆𝒍𝒆́𝒏𝒔𝒊𝒂, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐́𝒓 𝒔𝒊𝒓𝒂 𝒎𝒂𝒌 𝒉𝒂’𝒖 𝒓𝒆𝒔𝒑𝒆𝒊𝒕𝒖

Ohin, sei sai hanesan loron ikusliu mai ha’u partisipa iha serimónia graduasaun ne’e, tuir ámbitu mandatu VIII Governu Konstitusionál, tamba 2023 sei sai tinan ba eleisaun lejizlativa.

Tan ne’e maka, ha’u hakarak agradese ba komunidade akadémika Institutu Siénsias Saúde nian, espesiál liu, ba Magnífiku Reitór, ba apoiu no kolaborasaun durante períudu hosi ha’u-nia mandatu.

VIII Governu Konstitusionál mak harii Ministériu Ensinu Superiór, Siénsia no Kultura, ne’ebé primeira vés, haketak-an tiha hosi Ministériu Edukasaun, hodi fó atensaun espesiál liu ba Instituisaun sira Ensinu Superiór nian.

Maske nuudar Ministériu foun ida no ita enfrenta hela konstranjimentu oioin, hanesan pandemia COVID-19, instabilidade polítika ne’ebé halo Orsamentu Jerál Estadu 2020 la pasa, dezastre naturál ne’ebé afeta ona ita-nia país iha tinan-2020 no 2021, no foin lalais ne’e, mosu tan konflitu armadu entre Rúsia no Ukránia, ami konsege implementa medida oin-oin iha área ensinu superiór, ne’ebé nuudar baze importante hodi melloria kualifikasaun ba ita-nia rekursu umanu.

Iha nível reforsu liña koordenasaun entre Ministériu Ensinu Superiór, Siénsia no Kultura no Instituisaun sira Ensinu Superiór, ita kria ona Konsellu ba Reitór sira, hanesan Fórum ida ba diálogu no Konsulta Ministru nian.

Iha nível infraestrutura, ha’u salienta tan kona-ba kriasaun Projetu Universidade Aileu, ne’ebé iha ona Estudu Viabilidade no Dezeñu Enjeñaria Detallada konkluídu, no inísiu 1.ª faze konstrusaun ba edifísiu foun sira Institutu Politékniku Betanu nian.

Iha nível Bolsa Estudu sira, atribui ona:

• 1.873 Bolsa Estudu Hakbiit, ne’ebé fó ba estudante be maihosi família karensiada (Kbiit-Laek).

• 1.000 Bolsa Parsiál iha rai laran, ne’ebé fó ba estudante iha Instituisaun Ensinu Superior privadu sira.

• 47 Bolsa Estudu ba dosente sira husi Instituisaun Ensinu Superior privada sira no mós Bolsa Méritu hamutuk 30 hodi estuda iha paíz CPLP.

Ho objetivu atu promove maiór ligasaun entre Instituisaun sira Ensinu Superiór no merkadu-traballu, ami implementa ona Programa Estájiu Profisionál ba Mellores Graduadus husi Instituisaun Ensinu Superior públiku no privadu sira, ho benefisiáriu hamutuk ema nain 437 no sei kontinua iha tinan oin mai.

Atu asegura maiór kualidade iha ensinu superiór, Ministériu Ensinu Superiór, Siénsia no Kultura aprova tiha ona medida sira, mak hanesan: (i) Liña Kréditu “Ensinu Superiór Kualidade+ ba Instituisaun Ensinu Superiór Privadu sira; (ii) Polítika Ensinu Superiór iha Konsellu Ministrus, liuhusi Rezolusaun Governu N.º 1 /2022 loron-26 fulan-Janeiru; (iii) Rejime jurídiku ba Kurríkulu Padraun Nasionál Ensinu Superiór liuhosi Dekretu-Lei n.º 3/2022, loron-12 fulan-Janeiru.

Iha ámbitu kona-ba medida apoiu sosioekonómiku ne’ebé relasiona ho pandemia COVID-19, MESSK fó ona apoiu balun, mak hanesan:

• Apoiu asesu internét ba estabelesimentus ensinu superior privadu, inklui ligasaun Liña Internet ba Instituisaun Ensinu Superior privadu sira hamutuk 16 iha kampus sentrál no klase paralela ne’ebé hetan akreditasaun.

• Apoiu pagamentu Propinas ba semestre rua iha tinan-2021, liu-liu estudante hotu iha Instituisaun Ensinu Superiór públiku no privadu sira hamutuk 18.

• Fó apoiu halo distribuisaun fós, hamutuk ho MSSI, ba estudante sira Ensinu Superior ne’ebé hela iha Kós.

• Halo distribuisaun materiál prevensaun COVID-19 ba Instituisaun Ensinu Superiór públiku no privadu sira, liu-liu Máskaras no Hand Sanitizer.

Ita iha konsiénsia katak, servisu sira ne’ebé hala’o ona, la’ós perfeitu no ita hatene katak, sei falta servisu barak atu asegura melloria efetiva iha kualidade ensinu superiór.

Hanesan afirma Jenerál Taur Matan Ruak, atuál Primeiru-Ministru, katak: “com pouco, temos de fazer muito e mesmo que seja devagar, precisa de ter continuidade” / “with less, we must do more and even slowly, but sure”.

Ida-ne’e signifika katak ita labele halo buat hotu dala ida de’it ka ho forma ida lailais, maibé ita halo faze por faze hodi harii futuru nasaun nian, ita presiza asegura ninia kontinuidade servisu hodi hakat ba oin nafatin, mesmuke neneik maibé garante ninia finalidade no susesu.

Nune’e, ha’u fiar katak ho servisu ne’ebé ita halo ona, ita hahu hatu’ur ona baze atu hadi’ak sistema no asegura futuru ida di’iak-liu ba jerasaun foun.

𝑬𝒙𝒆𝒍𝒆́𝒏𝒔𝒊𝒂, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐́𝒓 𝒔𝒊𝒓𝒂 𝒎𝒂𝒌 𝒉𝒂’𝒖 𝒓𝒆𝒔𝒑𝒆𝒊𝒕𝒖

Ha’u sei la ko’alia barak tan iha intervensaun ne’e. Ha’u hakarak hato’o dala ida tan parabéns ba estudante sira ne’ebé ohin gradua. Hein katak imi hotu sei hetan susesu nafatin iha imi-nia vida pesoál no mós vida profisionál.

Maske imi hotu sei ba hasoru dezafiu no konstranjimentu oioin, imi tenke aten-barani nafatin atu luta no esforsu-an atu konkretiza imi-nia ambisaun, no atinji imi-nia objetivu sira.

Liuliu, mak imi tenke hatudu iha realidade imi-nia moris lorloron nian, sa’ida mak imi aprende tiha ona durante tinan barak iha imi-nia formasaun.

Obrigadu barak!