May 21, 2024

SERIMÓNIA ABERTURA KORESAUN PROVA BA INGRESU IHA IES PÚBLIKU UNTL & IPB

Dili, 8 janeiru 2024: Ministériu Ensinu Superiór, Siénsia no Kultura, liuhosi Komisaun ba Asesu Ensinu Superiór (CAES – Sigla Portugés), halo “Abertura ba Koresaun Prova ba Kandidatu sira-ne’ebé hakarak atu tama ba Ensinu Superiór Públiku, UNTL no IPB, ba tinan akadémiku 2024”. Serimónia ida-ne’e hala’o iha sala reuniaun MESSK nian, iha Colmera, Dili.

Objetivu hosi atividade ida-ne’e atu halo koresaun no avaliasaun ba kandidatu sira-nia prova ne’ebé molok ne’e tuir ona ezame liuhosi Rejime Espesiál, hodi hetan asesu ba Instituisaun Ensinu Superiór Públiku rua (2), UNTL no IPB, ba tinan akadémiku 2024 nian.

Implementasaun atividade ida-ne’e bazeia ba Diploma Ministeriál nº. 46/2023, 5 outubru nian, kona-ba “Asesu no Ingresu ba Ensinu Superiór Públiku UNTL no IPB”, ho kooperasaun ho servisu kompetente sira hosi UNTL, IPB, Ministériu Solidariedade Sosiál, Ministériu Estatál, Ministériu Edukasaun no hosi Konsellu Kombatente Libertasaun Nasionál (CCLN).

Totál kandidatu sira-ne’ebé inskreve no tuir ezame atu asesu ba IES públiku liuhosi Rejime rua (Rejime Jerál no Espesiál) hamutuk 15.648. Hosi númeru totál ne’e, kandidatu 2.740 selesionadu tiha hodi tuir ezame liuhosi rejime espesiál, no kandidatu sira seluk, hamutuk 12.908, mai hosi estudante sira-ne’ebé konklui ho susesu ensinu sekundáriu no inskreve tiha iha ida-idak nia eskola iha territóriu nasionál. Vaga hirak-ne’ebé sei prienxe iha Instituisaun Ensinu Superiór Públiku rua mak hanesan tuir mai: UNTL hamutuk 4.090 no IPB hamutuk 400.

Iha sesaun ida-ne’e, Sua Eselénsia Señor Ministru Ensinu Superiór, Siénsia no Kultura, Dr. José Honório, husu ba Komisaun no ba tékniku sira hotu atu kumpri sira-nia tarefa iha prosesu ida-ne’e ho seriedade no rigór, hodi nune’e garante kualidade no transparénsia iha prosesu prienximentu ba vaga sira.

Abertura simbólika ida-ne’e, ofisialmente lansa hosi Sua Eselénsia Señor Ministru no partisipa hosi Estrutura no Membru KAES, tékniku no funsionáriu sira hosi MESSK no Instituisaun relevantes sira ne’ebé serbisu-hamutuk iha programa ida-ne’e.

#Media_MESCC

0Shares