by Baucau, 30/08/2024: S. Exa. Ministru Ensinu Superiór, Siénsia no Kultura, Dr. José Honório, partisipa iha serimónia, selebrasaun loron konsulta popular (30 Agosto), iha Munisipiu Baucau Villa.
Hanesan mos membro governu sira seluk ne’ebé mak destaka ba iha kada munisipiu ida-idak ho nia ekipa sira, hodi selebra hamutuk loron Nasional memorial ida ne’e ho povu doben sira iha Timor-Leste.
Atividade ba selebrasaun loron nasional refere mos hahu kedas husi loron 28 Agostu 2024, ne’ebé inisia ho S. Exa. Ministru Ensinu Superiór, Siénsia no Kultura, Dr. José Honório, nia prezensa nudar orador iha Seminariu kona-ba 25º Aniversariu ba loron konsulta Popular nian ne’ebé ho tema ´´Povo Mak Funu! Povo Mak Terus! Povo Mak Manán Funu! Povo Mak Herói Boot, Ba Ukun rasik-na!.
Iha entrevista hafoin sesaun Seminiariu ne’e S. Exa. Ministru afirma ´´Liu husi Kontribuisaun ne’ebé mak Povo deside iha konsulta popular ho total 78,5%, Maioria Timor Oan hakarak Ukun rasik no livre. Ho Nune’e ita hotu kontinua servisu atu dezenvolve ita nia rain, apoio malu, servisu iha setor hotu-hotu, hodi responde ba saida mak ita bele kontinua kontribui ba ita nia Povo“.
Aleinde atividade ida ne’e, S. Exa. Ministru mos partisipa halo lansamentu ba atividade sira seluk hanesan: Atividade Sertame, Drum Band, Motor Cross, Jogos desportivus no atividade sira seluk. Kontinua iha loron 29 Agosto 2024, S. Exa Ministru ho nia delegasaun kontinua partisipa iha Missa agradesimentu, no hafoin de missa, ekipa sira kontinua ba kari ai-funan iha semiteriu sira ne’ebé mak Komissaun Organizadora defini ona tuir ajenda. Atividade hirak ne’e termina ho serimonia solenidade ba komemorasaun loron konsulta Popular 30 de Agosto ba dala 25º, iha Administrasaun Munisipiu Baucau, iha loron 30 Agosto 2024.
Hola parte iha selebrasaun loron nasional iha Munisipiu Baucau refere, akompañadu direta husi Presidente Autoridade Munispiu Baucau (PAM), Sra. Veneranda Lemos, ne’ebé mak prezente mos husi Kargus Xefias, Dirijentes, Téknikus no funsionárius sira husi MESSK, inklui mos autoridade lokal sira, Autoridade Seguransa, Autoridade Reliziojus sira, komunidade sira no mos Instituisaun relevantes sira ne’ebé mak pertense ba iha Munisipiu refere nian.
