by 
Díli, 01/10/2024: S. Exa. Ministru Ensinu Superiór, Siénsia no Kultura, Dr. José Honório, akompañadu husi Xefe Gabinete hamutuk ho Coordenador Unidade Parseria Kooperasaun no tékniku sira, halao sorumutu depespedida ho Estudante Bolseiru sira ne’ebé mak selesionadu ba programa bolso Estudu husi Institutu Camões nian, iha sala reuniaun MESSK, Colmera Díli.
Total estudante ne’ebé mak selesionadu ba bolsu estudu ne’e hamutuk nain 7, ne’ebé mak sei ba kontinua sira nia estudu iha nível Lisensiatura iha Pais Portugal. Estudante sira ne’e sei kolokadu ba iha area espesialidade oi-oin ne’ebé mak sira hili, no fundu ba finansiamentu responsável husi programa refere, ne’ebé mak oferese husi Governu Portugal ba Timor-Leste.
Bolso estudu husi Instituto Camões ne’e rasik, hanesan programa regular anual ne’ebé mak oferese oportunidade ba Timor oan sira ne’ebé mak iha meritu atu bele kontinua sira nia estudu nível lisensiatura iha Portugal.
Portanto, iha sesaun sotumutu ida ne’e, S. Exa. Ministru, Dr. José Honório, iha nia mensagem ba estudante sira, husu atu estudante sira ne’ebé mak selesionadu ona bele aproveita oportunidade ho di’ak, no tenke konsiente ba iha sira nia estudu hodi nune’e bele finaliza sira nia estudu, atu bele atinje objetivu no metas ne’ebé mak sira iha.
Estudante hirak ne’e antes ne’e, halao ona sira nia despedida mos hamutuk ho Embaixada Portugal iha Timor-Leste, no iha tempu besik sei halao sira nia viajem ba iha Portugal hodi, hahu sira nia jornada akademiku iha nível ensinu superior iha Portugal.
