February 24, 2024

MESSK Fahe Informasaun investimentu Bolsa Estudu Iha Diálogu S. Exa. Primeiru-Ministru ho Autoridade Lokál no Komunidade sira Munisípiu Ermera

S. Exa. Ministru Ensinu Superiór, Siénsia no Kultura (MESSK), Longuinhos dos Santos, hamutuk ho membru Governu balun kontinua akompaña S. Exa. Primeiru-Ministru Taur Matan Ruak hala’o diálogu ho Autoridade Lokál no Komunidade sira iha Munisípiu Ermera ho tema: “Reforsa Reziliénsia Nasaun Nian”.Iha diálogu ne’e, Sr. Daniel Soares do Carmo reprezenta sosiedade sivil munisipiu Ermera apresia ho polítika Governu, liuhusi Ministériu Ensinu Superior ne’ebé hahú estabelese Sidade Universitáriu Aileu hodi prepara rekursu umanu. Aleinde ne’e, Xefe Aldeia husi Suku Haufu, Postu Administrativu Letefoho, Domingas Soares, hato’o pergunta ida: graduadu sira ne’ebé sempre gradua iha kada tinan, maibe terseira idade sira mak sei kontinua okupa nafatin servisu, tambá sa mak la fó fatin ba sira hetan servisu?Hatan ba pergunta ida ne’e, S. Exa. Ministru Ensinu Superiór, Siénsia no Kultura afirma katak, wainhira ita halo graduasaun la signifika katak finalista sira tenke sai funsionáriu públiku iha instituisaun Estadu nian. Graduadu sira presiza iha espiritu empreendedorismu no utiliza siénsia ne’ebé mak sira apreende hodi bele hamosu kriatividade oin-oin no loke kampu traballu rasik.Iha oportunidade ida ne’e, S. Exa. Ministru Ensinu Superiór, Siénsia no Kultura fahe mós informasaun kona-ba progresu husi VIII Governu Konstitusionál ba iha investimentu rekursu umanu iha Timor-Leste: “Hau hakarak partilla informasaun, liu-liu kona-ba bolsa estudu ne’ebé mak finansia liuhusi Fundu Dezenvolvimentu Kapital Humanu (FDCH sigla portuges), ne’ebé iha tiha ona porvolta 6.401 benefisiáriu sira, mak distribui ba kada munisipiu”. Nune’e, Sr. Ministru informa katak benefisiáriu ba bolsa estudu husi Minisípiu Ermera ho total ema nain 353, ne’ebé fahe ba mane hamutuk 202, no feto hamutuk ema nain 151.Iha sorin seluk, Ministériu Ensinu Superiór, Siénsia no Kultura estabelese tiha ona iha tinan 2021 programa foun ida ho naran Bolsa Hakbi’it hamutuk 910, maibé husi númeru totál ida ne’e atribui espesialmente ba Munisípiu Ermera, hamutuk ema nain 54, ne’ebé fahe ba mane hamutuk 26, no feto hamutuk ema nain 28.Diálogu ne’e hala’o iha salaun Parokiál Glenu, Munisípiu Ermera, no hetan partisipasaun husi membru Governu balun, Prezidenti Autoridade Munisípiu, Administradór Postu, Xefi Suku, Xefi Aldeia, Prezidente CCITL, reprezentante relijiozu, veteranus, juventude no sosiedade sivil.

0Shares