Viantiane, Repúblika Demokrátika Popular Laos | 22 to’o 26 Juñu 2026
Ministériu Ensinu Superiór, Siénsia no Kultura (MESSK), liuhosi nia Pontu Fokál ba ASEAN, partisipa iha Enkontru Tékniku ba dala 89 hosi Komité ASEAN ba Siénsia, Teknolojia no Inovasaun (COSTI-89) no Reuniaun Ministrus ASEAN ba Siénsia, Teknolojia no Inovasaun (AMMSTI), ne’ebé realiza iha Viantiane, Repúblika Demokrátika Popular Laos.
Delegasaun Timor-Leste kompostu husi reprezentante sira husi MESKK no Institutu Nasionál Siénsia no Teknolojia, no hetan mós apoiu husi S. Exa. Embaixadór RDTL iha Laos, Sr. João Câmara.
Durante reuniaun sira-ne’e, delegasaun aprezenta progresu ne’ebé Timor-Leste alkansa ona no prioridade Governu nian iha área Siénsia, Teknolojia no Inovasaun (STI), ho enfaze ba polítika nasionál sira ne’ebé orienta ba dezenvolvimentu sustentável. Delegasaun mos destaka papél estratéjiku STI nian atu hasa’e kualidade edukasaun, moderniza setór agrikultura, reforsa sistema saúde no promove inovasaun iha setór prioridade sira seluk ba dezenvolvimentu nasaun nian.
Partisipasaun Timor-Leste iha fórum rejionál importante ida-ne’e reforsa kompromisu nasaun nian atu aprofunda kooperasaun ho Estadu-Membru ASEAN sira, liuhosi partilla esperiénsia, troka koñesimentu no dezenvolve inisiativa konjunta iha área siénsia, teknoljia no inovasaun.
Iha enseramentu reuniaun, Estadu-Membru ASEAN sira reafirma sira-nia kompromisu atu kontinua hametin kooperasaun rejionál iha área STI, hodi promove dezenvolvimentu sustentável, inkluzivu, reziliente no justu, atu kontribui ba hadi’a kualidade moris povu sira iha rejiaun ASEAN.
