by 
Dili, 15/04/2024: Unidade Relasaun Públika Ministériu Ensinu Superiór, Siénsia no Kultura, serbisu-hamutuk ho Ajénsia Teknolojia ba Informasaun no Komunikasaun (TIC Timor, I.P – Sigla Portugés), hala’o formasaun ba funsionáriu no tékniku sira MESSK nian kona-ba uza Sistema Cloud GoTL no Webmail, iha salaun MESSK, Colmera Díli.
Atividade ne’e nia objetivu atu fasilita oinsá uza rekursu dijitál sira no halais sistema administrasaun liuliu kona-ba arkivu no utilizasaun meiu dijitál ba komunikasaun, hodi nune’e bele reforsa sistema jestaun servisu Ministériu ida-ne’e nian. Formasaun ne’e mai kapasita liután funsionáriu sira iha área TIC nian no kontribui ba implementasaun sistema Governu Dijitál.
Objetivu prinsipál ida seluk hosi formasaun ida-ne’e maka atu kria kompeténsia ba funsionáriu sira hodi uza sistema Cloud GoTL ba arkivu dokumentu no dadus sira, no uza e-mail ofisiál nu’udar meiu komunikasaun institusionál.
Partisipante sira-ne’ebé hetan formasaun ne’e hamutuk 20 no nu’udar reprezentante hosi divizaun ida-idak Ministériu nian, no formadór sira hosi atividade ne’e maihosi TIC Timor, I.P. Tuir planu, formasaun ne’e hala’o hamutuk loron haat, hahú hosi loron 15 to’o 18 abril 2024.
Molok ne’e TIC Timor I.P ho MESSK rasik selebra ona Memorandu Entendimentu ida iha area teknolojia no informasaun nian hodi reforma sistema adiministrasaun no implementasaun governu eletróniku, nomós hodi fó apoiu tékniku ba servisu balu mak hanesan ligasaun internet, dezenvolvimentu portál ofisiál MESSK nian no servisu sira seluk iha área relevante sira.
Atividade ne’e hahú ho aprezentasaun kona-ba papél TIC Timor IP nian nomós sistema ne’e nian rasik hosi Xefe Departamentu ba Dezenvolvimentu, Implementasaun no Integrasaun Sistema, Sr. Geovanio Frederico Vinhas, no ikus liu sesaun ne’e loke ofisialmente hosi Diretor-Jerál Planeamentu no Finansas, Sr. Hernâni Viterbo da Costa Soares, akompañadu hosi Koordenadór Unidade Relasaun Públikas, Sr. Mafaldo Lopes Victor, hamutuk ho tékniku sira hosi TIC no MESSK rasik.
