Díli, 08 Setembru 2026 — Ministériu Ensinu Superiór, Siénsia no Kultura (MESSK), liu-hosi Diresaun Nasionál Kurríkulu Ensinu Superiór (DNCES), hala’o abertura ofisiál ba Semináriu Nasionál no Formasaun kona-ba Fortalesementu Internal Quality Assurance (IQA), ho objetivu atu reforsa implementasaun sistema garantia kualidade interna ba efetividade implementasaun kurríkulu iha Instituisaun Ensinu Superiór (IES) Públiku no Privadu sira.
Atividade ne’e hala’o durante loron rua, hahú hosi 08 to’o 09 Setembru 2026, iha Salaun Enkontru Fakuldade Agrikultura, Universidade Nasionál Timor Lorosa’e (UNTL), Hera.
Semináriu no formasaun ne’e nia objetivu prinsipál mak hametin kapasidade, koñesimentu no komprensaun Instituisaun Ensinu Superiór sira kona-ba sistema Internal Quality Assurance (IQA), liu-liu iha prosesu planeamentu, implementasaun, monitorizasaun no avaliasaun kualidade kurríkulu no prosesu ensinu no aprendizajen.
Atividade ne’e mos sai hanesan espasu importante ida atu promove partilla esperiénsia no koñesimentu entre Instituisaun Ensinu Superiór Públiku no Privadu sira, no hametin kompromisu hamutuk hodi garante kualidade no efetividade implementasaun kurríkulu iha ensinu superiór.
Abertura ofisiál ne’e hala’o hosi Inspetora-Jerál Ministériu Ensinu Superiór, Siénsia no Kultura, Sra. Natercia da Conceição Araújo, akompaña hosi dirijente sira husi MESSK, oradór no fasilitadór sira, no mos reprezentante sira husi Instituisaun Ensinu Superiór Públiku no Privadu iha Timor-Leste.
