May 21, 2024

DISEMINASAUN KURRÍKULU PADRAUN NASIONÁL BA IES SIRA IHA DÍLI

Díli, 15/04/2024: Ministériu Ensinu Superiór, Siénsia no Kultura, liuhosi Diresaun Nasionál Kurríkulu Ensinu Superiór, halo diseminasaun ba “Kurríkulu Padraun Nasionál Ensinu Superiór” atu nune’e implementa ona iha Instituisaun Ensinu Superiór sira iha Díli.

Atividade ne’e hala’o bazeia ba despaxu ministeriál n.º 09/II/MESCC/2024, ho nia objetvu atu disemina prosedimentu no regra sira hodi padroniza sistema kurríkulu iha Instituisaun Ensinu Superiór sira iha Timor-Leste, hanesan define ona iha Dekretu-Lei n.º 03/2022, 12 janeiru nian, kona-ba Rejime Jurídiku Kurríkulu Padraun Nasionál Ensinu Superiór Timor-Leste nian.

Sesaun hirak-ne’e hahú ho reuniaun ekipa hamutuk ho estrutura akadémiku instituisaun sira-nian hodi aprezenta programa nomós entrega dokumentu sira diseminasaun nian. Durante atividade ne’e la’o, ekipa halo mós monitorizasaun ba sistema kurrikulár hirak-ne’ebé mak uza hela iha Instituisaun Ensinu Superiór sira, hahú hosi inísiu to’o ohin loron hodi suporta sira-nia prosesu hotu. Atividade diseminasaun dahuluk ne’e realiza tiha hosi ekipa MESSK iha Intituisaun Ensinu Superiór sira balu iha Dili, mak hanesan IOB, UNPAZ, UNTL no UNITAL. Tuir planu, atividade ne’e sei hala’o iha IES sira hotu iha territóriu nasionál, nu’udar dalan ida atu monitoriza ninia prosesu implementasaun rasik.

0Shares