by 
Ekipa delegasaun husi Ministériu Ensinu Superiór, Siénsia no Kultura, kompostu husi Manan Nain ba Konkursu Proposta ´´Dalan ba Igualdade“, husi Instituisaun Ensinu Superiór 2 (Universidade da Paz no Instituto Politekniku Betano), hamutuk ho tékniku husi Ministériu, halao Study Visit kurtu tempu, hodi observa boas pratikas sira kona-ba implementasuan atividade Igualdade Jeneru iha Universidade Warmadewa, Denpassar Bali, Indonesia.
Atividade ne’e, realiza durante loron tolu (3) nia laran, hahu husi Loron 27 to’o 29 Agosto 2024, ho nia objetivu atu hodi, koñese no reforsa di’ak liu tan, tékniku no dosente sira nia koñesimentu kona-ba boas pratikas, implementasaun atividade sira ne’ebé ligadu ho assuntu jeneru iha Instituisaun Ensinu Superiór, liu-liu atu bele kontribui ba reforsa sira nia abilidade hodi, bele suporta programa no atividade sira ne’ebé mak sei implementa iha Futuru.
Atividade ne’ebé mak inklui iha programa ida ne’e, kompostu husi: loron dahuluk, iha sesaun abertura no workshop ho nia foku ba diskusaun grupo ligadu ho assuntu Igualdade Jeneru iha Universidade, ne’ebé ho nia orador Prof. Ratna Ayu Widiaswari, S.H., M.H, hanesan experiente iha area Igualdade Jeneru, no Orador husi MESSK, Sr. Julio Guterres, hodi partilla experiencia implementasuan igualdade Jeneru husi MESSK nian. No atividade sira seluk ne’ebé inklui iha loron rua (2) seluk, kompostu husi visita ba iha assosiasaun no grupu sira ne’ebé mak existe iha Universidade liderado husi Feto, visita Suku Penglipuran, hodi observa boas pratikas envolvimento feto ba iha desenvolvimento suku no iha setor turismo hodi kontribui ba desenvolvimento ekonomiku iha komunidade no ikus nian, ekipa kontinua halo visita ba iha, fakuldade sira ne’ebé existe iha Universidade, no Sentru Estudu Universidade nian.
Portanto, iha Biban ida ne’e, responsável Igualdade Jeneru husi Universidade da Paz (Sr. Marito de Araujo), no Instituto Politekniku Betano (Sra. Frangelina Xavier), demostra sira nia entusiamo atu hodi bele hetan experiensia liuhusi visita ida ne’e , atu bele aumenta sira nian referensia hodi bele apoio suporta ba implementasaun sira nia atividade iha periodu tinan ne’ebé sei mai.
Hola parte iha sesaun sira ne’e, Asistente Adidu Edukasaun Timor-Leste iha Bali ho nia ekipa, Vise-Reitor husi Universidade Warmadewa, ho Dekano husi Fakuldade Direito no nia estrutura, inklui mos dosentes no téknikus sira.
