Díli, [15 Jullu 2026] – Ministériu Ensinu Superiór, Siénsia no Kultura (MESSK) no Dalian University of Technology Press (DUTP) hosi Repúblika Popular China asina ona Memorandu Entendimentu (Memorandum of Understanding – MoU) kona-ba Kooperasaun Estratéjiku iha Ensinu Vokasionál, ho objetivu atu hametin parseria entre instituisaun rua no promove dezenvolvimentu ensinu Vokasionál ne’ebé responde ba nesesidade dezenvolvimentu ekonomia no merkadu servisu iha Timor-Leste.
Acordu ida-ne’e marka etapa importante ida iha relasaun kooperasaun edukasionál entre Timor-Leste no China, liuliu iha área ensinu vokasionál, liu-hosi prinsípiu fahe rekursu, hamutuk dezenvolve padraun edukasionál no hamosu benefísiu ba parte rua.
Iha fase dahuluk ba implementasaun Memorandu Entendimentu ne’e, MESSK no DUTP sei servisu hamutuk atu dezenvolve Padraun Abilidade Vokasionál (Vocational Skill Standards), Padraun Programa Ensinu Vokasionál (Vocational Education Major Standards), no Padraun Kuríkulu (Curriculum Standards) ne’ebé adapta ba prioridade setor estratéjiku no realidade indústrias iha Timor-Leste.
Tuir kompeténsia institusionál, MESSK sei halo avaliasaun no sertifikasaun ba padraun sira ne’ebé dezenvolve tuir lei, regulamentu no prosedimentu nasional vigora, antes integra sira ba Sistema Nasional Ensinu Vokasionál. Iha tempu hanesan, DUTP sei fó apoiu tékniku liu-hosi formasaun ba implementasaun padraun sira ne’e no promove utilizasaun padraun refere iha programa kooperasaun internasionál, inklui inisiativa “Vocational Education Going Global“ husi Governu China.
Kooperasaun estratéjika ida-ne’e espera bele kontribui ba hadi’a qualidade ensinu vokasionál iha Timor-Leste, hametin kapasidade rekursu umanu nasionál, no garante katak programa formasaun profisionál sira aliñadu ho nesesidade real setor produtivu no dezenvolvimentu nasionál.
Liu-hosi parseria ida-ne’e, MESSK reafirma nia komitmentu atu kontinua loke oportunidade ba kooperasaun internasionál ne’ebé bele fó benefísiu ba sistema ensinu superiór, siénsia, no liu-liu, ba dezenvolvimentu ensinu no formasaun profisionál iha Timor-Leste, hodi prepara juventude timor-oan atu sai rekursu umanu ne’ebé kompetente, inovadór no bele konkorre iha nível rejionál no internasionál.
