by 
Dili, 16/04/2024: Diretora-Jerál Ensinu Superiór no Siénsia, Dra. Maria Filomena Lay Guterres, halo abertura ofisiál ba Workshop kona-ba “Sistema Jestaun Dadus Ensinu Superiór Timor-Leste nian (SGDES-TL)”, ne’ebé Diresaun Nasionál Siénsia no Teknolojia, Ministériu Ensiinu Superiór, Siénsia no Kultura hala’o ba Instituisaun Ensinu Superiór sira, iha Salaun MSSI, Caicoli, Dili.
Atividade ne’e nia objetivu mak atu fó-sai informasaun sira kona-ba implementasaun Sistema Baze Dadus nian no ninia progresu iha Instituisaun Ensinu Superiór hirak-ne’ebé integra ona iha sistema ne’e. Nune’e mós hodi divulga kona-ba saida mak atu implementa tuirmai no instituisaun ida-idak mak sei jere rasik.
Sistema ne’e hala’o liuhosi servisu hamutuk ho UNTL ne’ebé Ministériu lansa tiha iha fulan-abríl, tinan 2023. Daudauk ne’e, iha faze dahuluk nia laran, instituisaun Ensinu Superiór 13 mak hola parte no seidauk tama iha sistema online. Tuir planu, iha faze tuirmai, sei integra mós instituisaun hirak-ne’ebé seidauk tama.
Kria sistema ida-ne’e atu sai Sistema Dadus Sentrál ida hodi halibur hamutuk instituisaun hotu-hotu ne’ebé eziste iha Timor-Leste, atu nune’e garante informasaun ne’ebé efikás no halo ema fiar. Iha sistema ne’e Ministériu rasik mak sei jere no dadus sira maihosi Instituisaun Ensinu Superiór sira.
Iha workshop ne’e oradór sira mai hosi departamentu tékniku responsavel ba dezenvolvimentu Sistema, Universidade Nasionál Timor Lorosa’e (UNTL) nian, no partisipante sira mak tékniku sira nomós reprezentante sira hosi instituisaun 13 ne’ebé eziste iha rai-laran.
