June 14, 2024

MESSK Husu Inan ho Aman Sira Tenki Vasina

S. Exa. Ministru Ensinu Superiór, Siénsia no Kultura, (MESSK), Longuinhos dos Santos, nafatin husu ba inan no aman sira tenki simu Vasina, tamba vasina mak bele proteje ita husi Covid-19.

Kampaña vasina ba loron daruak ne’e, hala’o iha Aldeia Luguli, Suku Manapa, Postu Administrativu Cailaco, Munisípiu Bobonaro.

Iha intervensaun, Sr. Ministru husu ba inan no aman sira tenki vasina, tanba vasina mak dalan úniku atu proteje ida-idak nia an no proteje ninia família no sosiedade no kontribui ba ita-nia oan sira atu bele bá filafali eskola ho kondisaun normál. “Tamba ne’e, dala ida tan agradese ba inan no aman sira ne’ebé mak marka prezensa iha fatin ne’e, kontinua halolon informasaun ba ita-nia maluk sira ne’ebé mak seidauk simu vasina no la bele konsumu lia falsu (hoax)”, dehan Sr. Ministru.

Kampaña vasinasaun ba loron daruak iha Suku Manapa ohin hetan mos aumentu númeru vasinasaun ba Primeiru Doze e Segundu Doze. Ohin iha Suku Manapa Aldeia Luguli, Pesoál Saúde sira la’os de’it halo atendimentu ba vasinasaun, maibé sira mós loke atendimentu ba konsulta jerál ne’ebé hetan apoiu mós husi Cruz Vermelha.

Atividade kampaña vasinasaun ida ne’e, hetan kolaborasaun di’ak husi Administradór Postu, Xefi Suku, Xefi Aldeia no ekipa husi Ministériu Saúde nasionál, munisípiu no postu nian no mós husi PNTL Postu Cailaco nian rasik.

0Shares