by S. Exa. Ministru Ensinu Superiór, Siénsia no Kultura, Longuinhos dos Santos, hamutuk ho membru Governu balun kontinua akompaña S. Exa. Primeiru-Ministru Taur Matan Ruak hala’o diálogu ho Autoridade lokál no Komunitária sira iha Munisípiu Ataúro ho tema: “Reforsa Reziliénsia Nasaun Nian”.Iha diálogu ne’e, Xefi Suku Biqueli, Daniel Martins, hato’o pergunta balun kona-ba Ataúro nia oan sira balun bele hetan asesu ba bolsa estudu no mós posibilidade atu loke Universidade iha Munisípiu Ataúro.Hatan ba pergunta sira ne’e, S. Exa. Ministru Ensinu Superiór, Siénsia no Kultura informa katak tinan ida ne’e Ministériu, liu husi FDCH, prepara tiha ona vagas ba Bolsa Hakbi’it hamutuk 1000 ne’ebé sei atribui ba estudante sira husi Munisípiu hotu inklui mos Ataúro. Sr. Ministru mós explika katak orienta ona ekipa tékniku husi Ministériu iha tempu badak bele desloka mai iha Munisípiu Ataúro hodi identifika oan sira ne’ebé mak mai husi família karensiada (kbi’it Laek), atu bele asesu ba bolsa ida ne’e.Relasiona ho proposta atu hari’i Universidade iha Munisípiu Ataúro, Sr. Ministru informa katak ida ne’e la bele realiza tanba medida ne’e la inklui iha Planu Estratéjiku Dezenvolvimentu Nasionál no mós iha programa husi VIII Governu Konstitusionál nian, maibé ba futuru bele hare’e kestaun ida ne’e. Diálogu ne’e hala’o iha Salaun Parokiál Ataúro no hetan partisipasaun husi membru Governu balun, Sekretáriu Munisipiu Ataúro, Prezidenti Autoridade Munisípiu Díli, Komandante Munisípiu Dili, Xefi Suku, Xefi Aldeia, reprezentante relijiozu, veteranus, grupu juventude no sosiedade sivil.
