𝐒𝐎𝐑𝐔𝐌𝐔𝐓𝐔 𝐊𝐎𝐎𝐑𝐃𝐄𝐍𝐀𝐒𝐀𝐔𝐍 𝐁𝐀 𝐈𝐌𝐏𝐋𝐄𝐌𝐄𝐍𝐓𝐀𝐒𝐀𝐔𝐍 𝐏𝐎𝐋𝐈𝐓𝐄𝐊𝐍𝐈𝐊𝐔 𝐓𝐔𝐑𝐈𝐒𝐌𝐔 𝐋𝐎𝐒𝐏𝐀𝐋𝐎𝐒

Lospalos, 24/04/2024: Ekipa tekniku Koordenasaun ba Implementasaun Instituto Politekniku Lopalos ne’ebé mak lidera husi Koordenador Komissaun, Sr. Afonso Alves, akompañadu husi Koordenador Unidade Relasaun Públikas, Sr. Mafaldo Victor Lopes, ho nia ekipa halo sorumutu ho Administrador Munisipiu Lautem, ba koordenasaun implementasaun Instituto Politekniku Lospalos ne’ebé mak sei hahu iha tinan oin mai.

Objetivu husi sorumutu ne’e, rasik atu hodi halo koordenasaun tekniku kona-ba prosesu tekniku sira ne’ebé mak tempu besik governu liu husi ministériu ensinu supérior, siénsia no kultura, sei loke Instituisaun Ensinu Supérior foun ida iha Lospalos.

Instituto politekniku foun ne’e rasik, hanesan programa prioridade ida husi IX Governu nian ne’ebé tuir Planu Estratejiku Nasional, atu hodi loke Instituto ida ne’ebé mak ho nia foku ba iha area Hotelaria no Turismo nian, hodi bele reforsa investimentu ba hasae kualidade ensinu supérior iha Timor-Leste nian, hodi prepara rekursu umanu ne’ebé kualidade hodi servisu Timor-Leste iha futuru mai.

Iha sorumutu ida ne’e, ekipa halo koordenasaun hodi identifika no observa fatin ba operasionalidade administrativa no insfrastutura no inklui kolia mos apresentasaun kona-ba prosesu preparasaun ba konstrusaun edifisiu ba Instituisaun ne’e rasik, hodi preve ba planu orsamentu MESSK nian iha periodu oin mai, atu bele implementa.