by 
Betano, 9/04/2024: Ekipa téknika hosi Diresaun Jerál Planemanetu no Finansas (DGPF – Sigla Portugués) lideradu hosi Diretór Jerál, Hernâni Viterbo da Costa Soares, hamutuk ho Diretór Nasionál Aprovizonamentu, Sr. Baptista Silva, ho MESSK nia enjeñeiru sira halo supervizaun no monitorizasaun ba projetu konstrusaun edifísiu ne’e nia progresu, iha Betanu, Munisípiu Manufahi.
Objetivu hosi atividade ida-ne’e atu haree projetu ne’e nia progresu no identifika saida mak sei falta no problema balu hanesan propriedade rai ne’ebé afeta ba prosesu konstrusaun drenajen bee no kanalizasaun drenajen alternativa ba parte esteriór. Supervizór sira mós analiza kona-ba risku bee tama arredores edifísiu nian bainhira udan boot.
Atividade ida-ne’e hetan rekoñesimentu hosi Administradór Munisípiu Manufahi, no iha monitorizasaun ne’e ekipa realiza hamutuk ho empreza konstrutór no empreza konsultoria MESSK nian ne’ebé destaka iha terrenu.
Tuir planu ba projetu ne’e, sistema drenajen ne’ebé sei utiliza iha edfísiu foun ne’e mak métodu drenajen alternativu hodi responde ba infiltrasaun bee bainhira iha tempu udan, nomós sei kanaliza ba esteriór bainhira bee nakonu liu. Ho métodu nune’e sei antesipa bee la bele tama ba edifísiu foun.
Daudauk ne’e progresu ba konstrusaun edifísiu IPB nian atinje ona liu 64% tuir planu. Tuirmai, sei hala’o supervizaun dala ida tan ba konstrusaun ne’e ho ninia instalasaun sira.
