by 
Dili, 31 janeiru 2024: Ekipa Unidade Parseria no Kooperasaun hosi Ministériu Ensinu Superiór, Siénsia no Kultura, ne’ebé dirije hosi koordenadór Unidade Protokolu no Kooperasaun (UPC, sigla portugés), Sr. Paulo Mariano, no akompaña hosi Xefe Gabinete Sr. Ministru nian no tékniku sira, simu iha audiénsia delegasaun téknika ida hosi Universidade Warmadewa, Bali, Indonesia, iha sala reuniaun MESSK, edifísiu Colmera, Dili.
Objetivu hosi reuniaun ne’e atu fó kontinuidade ba prosesu asinatura akordu tékniku ne’ebé mak sei asina, iha tempu badak, entre Ministériu Ensinu Superiór, Siénsia no Kultura ho Instituisaun Ensinu Superiór refere.
Akordu ne’ebé halo ho Instituisaun refere propoin oferese ba Timor-Leste, liuhosi MESSK, formasaun iha área sira dezenvolvimentu ensinu superiór nomós ba kapasitasaun rekursu umanu MESSK nian.
Partisipa iha reuniaun ne’e delegasaun hosi Universidade Warmadewa, tékniku no asesór sira hosi MESSK rasik.
