Díli, 09 Jullu 2026 – Ministériu Ensinu Superiór, Siénsia no Kultura (MESSK), liu-hosi Unidade Parseria no Kooperasaun (UPK), simu delegasaun husi Guangxi Normal University, Repúblika Populár Xina, iha Sala Enkontru MESSK, Kolmera.
Objetivu husi enkontru ida-ne’e mak atu haforsa relasaun kooperasaun entre MESSK no Guangxi Normal University, liu-liu iha área ensinu superiór, hodi promove dezenvolvimentu rekursu umanu no kapasidade institusionál iha Timor-Leste. Parte rua mos troka hanoin kona-ba oportunidade servisu hamutuk iha área turizmu, jestaun turizmu, enjenária dezeñu, no peskiza siéntífika.
Durante diskusaun ne’e, parte rua mos ko’alia kona-ba posibilidade asinatura Akordu Tékniku (Technical Agreement) ida atu fasilita oportunidade bolsu estudu ba estudante timor-oan iha nível Mestradu no Doutoramentu, liu-hosi programa iha área STEAM (Siénsia, Teknolojia, Enjeñaria, Arte no Matemátika).
Aleinde ne’e, diskusaun refere mos fó atensaun espesiál ba planu estabelese Eskola Superior Otelaria no Turizmu iha Munisípiu Lautém, iha Lospalos. Ho Inisiativa ida-ne’e espera bele kontribui ba dezenvolvimentu setór turizmu nasionál liu-hosi formasaun profisionál, peskiza aplikadu no dezenvolvimentu kompeténsia rekursu umanu tuir nesesidade merkadu servisu.
Enkontru ne’e reflete kompromisu MESSK atu kontinua loke oportunidade kooperasaun internasionál ho instituisaun ensinu superiór prestijiadu sira, hodi hasa’e kualidade ensinu superiór, peskiza siéntífika no inovasaun iha Timor-Leste.
