Liquiçá, 22–26 Jullu 2026 – Ministériu Ensinu Superiór, Siensia no Kultura (MESSK), liu-hosi servisu hamutuk ho Sekretaria Estadu ba Igualdade (SEI), realiza formasaun ho tema “Hametin Kbi’it Deklarasaun Maubisse III hodi Transforma Ambiente Servisu ne’ebé Inkluzivu, Seguru no Livre husi Violénsia Bazeia ba Jéneru”, ne’ebé realiza iha Salaun Autoridade Munisipál Liquiçá.
Formasaun ne’e ho objetivu atu hasa’e koñesimentu, kapasidade no konsiénsia funsionáriu sira kona-ba igualdade jéneru, direitus umanus, prevensaun violénsia bazeada ba jéneru (VBJ), no responsabilidade institusionál atu kria fatin servisu ida ne’ebé inkluzivu, seguru no respeita dignidade ema hotu.
Liu-hosi atividade ida ne’e, partisipante sira hetan oportunidade atu aprofunda sira-nia kompreensaun kona-ba implementasaun Deklarasaun Maubisse III, nune’e mós hametin kompromisu kolektivu atu promove ambiente servisu ida ne’ebé livre husi diskriminasaun, asédiu no violénsia bazeada ba jéneru.
MESSK fiar katak liu-hosi inisiativa hanesan ne’e, sei kontribui ba dezenvolvimentu ambiente servisu ida ne’ebé inkluzivu liu, seguru, respeitu malu no profesionál, hodi asegura katak funsionáriu hotu bele hala’o sira-nia kna’ar ho dignidade, igualdade no responsabilidade.
