March 1, 2024

MESSK Partisipa Iha Serimónia Inaugurasaun Edifísiu Fakuldade Ekonomia no Jestaun UNTL

S. Exa. Ministru Ensinu Superior, Siénsia no Kultura, Longuinhos dos Santos, partisipa iha serimónia inaugurasaun edifísiu Fakuldade Ekonomia no Jestaun iha Universidade Nasionál Timor Lorosa’e (UNTL).Iha diskursu, Sr. Ministru hatete katak: “importante tebes atu dosente no estudante sira iha sala aula ne’ebé adekuada, laboratóriu espesializadu no biblioteka, hodi partisipa ho ativa iha prosesu ensinu no aprendizajen. Nune’e, inaugurasaun edifísiu ida-ne’e, iha signifikadu boot tebes, tanba bainhira UNTL iha kondisaun ne’ebé di’ak, ne’e reprezenta mós oportunidade atu hadi’ak liutan kualidade rekursu umanu ne’ebé permite atu ita-nia Nasaun bele kumpri nia mehi ba dezenvolvimentu nasionál no bele sai Paíz ida ne’ebé justu no prósperu”.Sr. Ministru halo apelu ba dosente no estudante sira atu “tau-matan ba instalasaun sira-ne’e ho haree-didi’ak no uza edifísiu ne’e ho objetivu atu hadi’ak prosesu ensinu no aprendizajen nian, tambá Estadu investe ona hodi harii edifísiu ne’e no presiza tau onra ba esforsu finanseiru ida-ne’e”. Serimónia ida-ne’e hetan partisipasaun husi Vise-Ministru Komérsiu no Indústria, Prezidente Komisau Funsaun Públika, Diretór Ezekutivu ANAAA, Vise II INCT, Magnífiku Reitor UNTL, Dekanu no mos konvidadu sira seluk.

0Shares