Ekipa Diresaun Nasionál ba Planeamentu Parseria no Estatístika MESSK nian halo asaun konsolidasaun ho autoridade lokál no komunidade ne’ebé afetadu ho konstrusaun Instututu Politékniku Betanu (IPB)

Ekipa Diresaun Nasionál Planeamentu Parseria no Estatístika hosi Ministériu Ensinu Superiór, Siénsia no Kultura hala’o atividade konsolidasaun ho autoridade lokál no komunidade afetadu ho konstrusaun IPB nian no halo levantamentu ba dadus tékniku hamutuk ho liña ministeriál sira, hanesan Ministériu Obra Públika, Ministériu Agrikultura no Peska no Ministeriu Justisa (liuhosi Sekretáriu Estadu Terra no Propriedade).

Iha Sorumutuk ne’e, Vise-Prezidente IPB hato’o importánsia kona-ba futuru instalasaun IPB ne’ebé mak sei garante labarik sira-nia futuru. Atividade ne’e, atu deside kona-ba ezijénsia rua ne’ebé mak komunidade afetadu sira hato’o ona iha reuniaun uluk, hanesan atu fó indemnizasaun ba uma no ai-horis. Informa mós katak, aban-bainrua maka harii duni IPB, sei fó oferta empregu ba komunidade.

Atividade ne’e lidera husi Diretór Nasionál Planeamentu Parseria no Estatístika, Sr. Mafaldo Lopes Victor, no hetan partisipasaun husi reprezentante Administradór Munisípiu Manufahi, Administradór Postu Betano Sr. Amandio do Rosario, Komandante PNTL Manufahi, no 2º Komandante PNTL, Xefe-Suku Betano, Xefe Aldeia, Ekipa Téknika MESSK nian, estudante IPB, Prezidente no Vise-prezidente (I – II) no komunidade ne’ebé afetadu.