𝐋𝐄𝐈 𝐁𝐀𝐒𝐄 𝐄𝐍𝐒𝐈𝐍𝐔 𝐒𝐔𝐏É𝐑𝐈𝐎𝐑 𝐏𝐀𝐒𝐒𝐀 𝐈𝐇𝐀 𝐕𝐎𝐓𝐀𝐒𝐀𝐔𝐍 𝐅𝐈𝐍𝐀𝐋 𝐅𝐀𝐒𝐄 𝐆𝐋𝐎𝐁𝐀𝐋

Díli, 24/06/2024: Ekipa Ministériu Ensinu Supérior, Siénsia no Kultura, lideradu husi S. Exa. Ministru, Dr. José Honório, ne’ebé akopañadu husi Teknikus sira, ne’ebé kompostu husi Diretora Jeral (Interina), Assesor Nasional no Internasional sira inklui kargus xefias sira, partisipa iha sesaun plenária ba apresentasaun no dikusaun proposta Lei Noº. 5/VI (1ª), ´´Lei Base Ensinu Supérior, iha Parlamentu Nasional.

𝐏𝐫𝐨𝐩𝐨𝐬𝐭𝐚 𝐥𝐞𝐢 𝐛𝐚𝐬𝐞 𝐄𝐧𝐬𝐢𝐧𝐮 𝐒𝐮𝐩é𝐫𝐢𝐨𝐫 𝐢𝐝𝐚 𝐧𝐞’𝐞, 𝐡𝐨 𝐧𝐢𝐚 𝐫𝐞𝐳𝐮𝐥𝐭𝐚𝐝𝐮 𝐯𝐨𝐭𝐚𝐬𝐚𝐮𝐧 𝐟𝐢𝐧𝐚𝐥, 𝐀 𝐟𝐚𝐯𝐨𝐫 𝟑𝟖, 𝐊𝐨𝐧𝐭𝐫𝐚 𝟗 𝐧𝐨 𝐀𝐛𝐬𝐞𝐭𝐞𝐧𝐬𝐚𝐮𝐧 𝟒, 𝐡𝐨 𝐧𝐢𝐚 𝐬𝐢𝐠𝐧𝐢𝐟𝐢𝐤𝐚 𝐤𝐚𝐭𝐚𝐤, 𝐩𝐫𝐨𝐩𝐨𝐬𝐭𝐚 𝐥𝐞𝐢 𝐫𝐞𝐟𝐞𝐫𝐞, 𝐩𝐚𝐬𝐬𝐚 𝐨𝐧𝐚 𝐢𝐡𝐚 𝐟𝐚𝐬𝐞 𝐠𝐥𝐨𝐛𝐚𝐥 𝐧𝐢𝐚𝐧.

Portante, elaborasaun ba iha proposta de lei refere, rasik antes ne’e iha semana hirak liu ba, iha loron ekipa konjunta ne’ebé kompostu husi Ministériu rasik, hamutuk ho Parlamentu nasional liuhusi Komisaun G, hamutuk ho Instituisaun relevantes sira, halo ona revisaun no diskusaun teknika hodi redifini fila definisaun leis sira, atu kondiz ho necessidade Ensinu Supérior, iha Timor-Leste nian.

Atualmente, Ministériu sei utiliza Lei Base Edukasaun Noº. 14/2008, 29 Outubro, nian ne’ebé mak hodi regula, kona-ba setor edukasaun inklui mos Ensinu Supério. Maka ho prezensa husi Lei Base Ensinu Supérior ida ne’e, sei hafahe ona kompetensia regulamentu ne’ebé mak antes ne’e vigora ona, liu-liu regras konaba reforma implementasaun area kursu sira hanesan Lisensiatura, Mestradu no Doutoramentu sira iha Insituisaun Ensinu Supérior Timor-Leste nian.

Iha sesaun ida ne’e, depois Votasaun final remata, S. Exa. Ministru Ensinu Supérior, Siénsia no Kultura, Dr. José Honório, hateten ´´Lei kuadru foun ida ne’e, sei kolia ho espesialidade liu kona-ba ensinu supérior nian, ne’ebé mak defini mos ona iha opsaun politika IX governu nian, liu-liu hakarak atu resolve kondisaun atual Ensinu Supérior iha Timor-Leste nian, atu aposta liu ba reforsa kualidade Ensinu Supérior iha Timor-Leste nian“.