𝐒𝐎𝐑𝐔𝐌𝐔𝐓𝐔 𝐊𝐔𝐈𝐒 𝐇𝐎 𝐑𝐄𝐈𝐓𝐎𝐑 𝐇𝐔𝐒𝐈 𝐈𝐄𝐒 𝐏𝐑𝐈𝐕𝐀𝐃𝐔𝐒 𝐊𝐎𝐍𝐀𝐁𝐀 𝐅𝐔𝐍𝐃𝐔 𝐒𝐔𝐁𝐕𝐄𝐍𝐒𝐀𝐔𝐍 𝐏𝐔𝐁𝐋𝐈𝐊𝐀 𝐁𝐀 𝐈𝐄𝐒 𝐏𝐑𝐈𝐕𝐀𝐃𝐔

Díli, 09/05/2024: Ministériu Ensinu Supérior, Siénsia no Kultura liuhusi Komisaun Kordenadora Universidade e Instituto Superior (CUIS-Sigla Portugés), realiza sorumutu ho Magnifkus reitor husi Instituisaun Ensinu Supérior Privadu 17 iha salaun MESSK, colmera Díli, hodi kolia kona-ba atribuisaun subvensaun publikas ne’ebé mak hetan aprovasaun husi S. Exa. Primeiro Ministro hodi, apoio ba Instituisaun Ensinu Supérior Privadu sira.

Objetivu husi sorumutu ida ne’e, atu informa ba Instituisaun Ensinu Supérior Privadu sira, konaba, preparasaun administrativas no rekezitus sira ne’ebé mak sei kumpri husi Instituisaun Ensinu Supérior sira, atu hodi hetan, fundu subvensaun publikas ho montante 5 milhoes ne’ebé mak, governu sei atribui ba iha setor privadu sira ne’e, atu hodi reforsa ba melloramentu kualidade akademiku no sistema ensinu supérior iha Timor-Leste.

Portanto, fundu subvensaun publikas ida ne’e, sei atribui ba iha Instituisaun Ensinu Supérior sira tuir necessidade ne’ebé mak Instituisaun Sira ida-idak iha hanesa, melloramentu infraestrutura, administrativas, kapasitasaun rekursu umanu, no seluk tan ne’ebé mak bele ajuda atu hodi mellora kualidade Instituisaun nian.

Sorumutu ne’e lidera husi Diretora Jeral Ensinu Supérior, Sra. Maria Filomena Lay Guterres, ne’ebé mak akompaña husi Diretor Jeral Planeamentu no Finansas, Sr. Hernâni Viterbo da Costa Soares, Inspetor Jeral no Auditoria, Sr. Domingos Barros no Koordenador KUIS rasik, Sr. Edmundo Viegas.

Tuir prossesu ne’ebé mak iha, atribuisaun fundus ida ne’e, sei base-ia ba proposta ne’ebé mak sei submete mai husi Instituisaun Ensinu Supérior Privadu sira no, sei liu husi fase kontratasaun ne’ebé mak inklui mos nia kronograma horariu ba limitasaun no rekezitus prosesual nian.