𝐌𝐄𝐒𝐒𝐊 𝐑𝐄𝐀𝐋𝐈𝐙𝐀 𝐒𝐎𝐑𝐔𝐌𝐔𝐓𝐔 𝐇𝐎 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈𝐏𝐈𝐔 𝐋𝐀𝐔𝐓𝐄𝐌 𝐇𝐎𝐃𝐈 𝐒𝐄𝐍𝐒𝐈𝐁𝐈𝐋𝐈𝐙𝐀 𝐊𝐎𝐍𝐀-𝐁𝐀 𝐈𝐌𝐏𝐋𝐄𝐌𝐄𝐍𝐓𝐀𝐒𝐔𝐀𝐍 𝐈𝐍𝐒𝐓𝐈𝐓𝐔𝐓𝐔 𝐏𝐎𝐋𝐈𝐓𝐄𝐊𝐍𝐈𝐊𝐔 𝐋𝐎𝐒𝐏𝐀𝐋𝐎𝐒

Lospalos, 04/07/2024: S. Exa. Ministru Ensinu Superiór Siénsia no Kultura, Dr. José Honório, hamutuk ho tékniku sira husi MESSK, realiza sorumutu ho Autoridade Munisipiu Lautem iha Salaun Administrasaun Munisipiu Lautem iha Lospalos Villa, hodi sensibiliza kona-ba planu implementasuan Institutu Politekniku Hotelaria no Turizmu Lospalos, ne’ebé mak governu planeia ona atu harii iha tempu besik.

Objetivu husi sorumutu ida ne’e, atu hodi sosializa kona-ba prosesu implementasaun Institutu Politékniku Hotelaria no Turizmu Lospalos nian, ne’ebé mak planea ona atu hahu nia Instalasaun no konstrusaun iha tinan 2025 mai, no sensibiliza mos kona-na preparasaun tékniku sira ne’ebé mak oras ne’e dau-daun lao hela, hanesan preparasaun ba dezeñu Infrastrutura, koordenasaun no elaborasaun prosedimentus téknikus nessesarius sira seluk.

Ministeriu rasik tuir despaixu Ministérial, Ministériu Ensinu Superiór, Siénsia no Kultura nian, N.º 14/III/MESCC/2024, fo ona kompetensia hodi forma komisaun téknika espesifika ida, hodi hare ba iha Implementasuan estabelesimentu Ensinu Superiór tékniku sira ba iha Munisipiu sira hanesan, Covalima, Manatuto no mos Lautem nian rasik. Ne’ebé ho nia responsabilidade atu hodi halo koordenasaun teknika ho autoridade sira, departamentu governu nian ne’ebé mak relevante no identifika rekursus nessesidades sira ne’ebé nessesariu hanesan, rekursu Umanu no mos rekursu material.

Iha sesaun ne’e, S. Exa. Ministru Ensinu Superiór, Siénsia no Kultura, Dr. José Honório afirma katak ´´Implementasaun ba Instituisaun Ensinu Supérior Publiku foun sira ne’e, hanesan mos kompromisu politika IX governu nian, ne’ebé mak planeia hakarak atu harii Institutu Politekniku Hotelaria no Turismu iha Lospalos, Institutu Politeknika Engeñaria iha Suai no Akademia Peska no Estudu Mariña nian iha Manatuto.

Portanto, hola parte iha Sesaun ida ne’e, Prezidente Autoridade Munisipiu Lautem, hamutuk ho nia Estrutura, ekipa tékniku sira husi Ministériu Ensinu Supérior, Siénsia no Kultura no mos entidades relevantes sira ne’ebé maka hola parte mos iha sesaun refere.