𝐌𝐄𝐒𝐒𝐊 𝐊𝐎𝐍𝐓𝐈𝐍𝐔𝐀 𝐑𝐄𝐊𝐎𝐋𝐋𝐀 𝐃𝐀𝐃𝐔𝐒 𝐈𝐍𝐒𝐓𝐈𝐓𝐔𝐈𝐒𝐀𝐔𝐍 𝐄𝐍𝐒𝐈𝐍𝐔 𝐒𝐔𝐏𝐄𝐑𝐈Ó𝐑 𝐒𝐈𝐑𝐀

Ekipa Diresaun Nasional Siénsia no Teknolojia, hosi Ministériu Ensinu Superior, Siénsia no Kultura, kontinua rekolla dadus Ensinu Superiór hodi halo atualizasaun ba baze-dadus Ensinu Superiór Timor-Leste nian. Atividade ida-ne’e hala’o hosi loron 11 to’o 15 marsu 2024, iha Instituisaun sira hotu iha Munisípiu Dili.

Objetivu hosi atividade ne’e atu atualiza baze-dadus, estudante sira-nian nomós ba dosente sira, ne’ebé rejistadu ona iha instituisaun sira iha territóriu nasionál.

Daudaun ne’e, Ministériu dezenvolve ona baze-dadus dijitál hodi hatama informasaun hotu-hotu hosi Instituisaun sira iha territóriu nasionál, atu nune’e garante kualidade, lia-loos no asesu ho forma ida-ne’ebé efisiente.

Atividade ne’e hahú hosi UNPAZ, UCT, UNDIL, ISFIT, IFFS, JSI/JSU, UNITAL ICS no Instituisaun Ensinu Superiór sira seluk tan iha Munisípiu Dili. Tuir planu, atividade ne’e sei halo mós ba instituisaun Ensinu Superiór sira seluk iha territóriu nasionál.