July 21, 2024

𝐀𝐍𝐔𝐍𝐒𝐈𝐔 – ´´𝐃𝐀𝐋𝐀𝐍 𝐁𝐀 𝐈𝐆𝐔𝐀𝐋𝐃𝐀𝐃𝐄“ – 𝐊𝐨𝐧𝐤𝐮𝐫𝐬𝐮 𝐏𝐫𝐨𝐩𝐨𝐬𝐭𝐚 𝐏𝐥𝐚𝐧𝐮 𝐧𝐨 𝐀𝐭𝐢𝐯𝐢𝐝𝐚𝐝𝐞 𝐈𝐦𝐩𝐥𝐞𝐦𝐞𝐧𝐭𝐚𝐬𝐚𝐮𝐧 𝐈𝐠𝐮𝐚𝐥𝐝𝐚𝐝𝐞 𝐉é𝐧𝐞𝐫𝐮 𝐢𝐡𝐚 𝐈𝐧𝐬𝐭𝐢𝐭𝐮𝐢𝐬𝐚𝐮𝐧 𝐄𝐧𝐬𝐢𝐧𝐮 𝐒𝐮𝐩é𝐫𝐢𝐨𝐫 𝐓𝐢𝐦𝐨𝐫-𝐋𝐞𝐬𝐭𝐞

“Dalan ba Igualdade” – Konkursu Proposta no Atividade Implementasaun Igualdade Jéneru iha Instituisaun Ensinu Superiór

Ministériu Ensinu Superiór, Siénsia no Kultura, hanesan Instituisaun responsavel ba asuntu Ensinu Superiór nian ne’ebé mak difine iha orgánika Ministériu nian, tuir Dekretu lei No.56/2024 6 Setembru, hodi fo kompeténsia tomak hodi ezerse nia funsaun nu’udar Instituisaun ne’ebé iha responsavel ba planeamentu polítika no estratéjika ba melloramentu sistema ensinu superiór iha Timor-Leste nian.

Ho nune’e alvu importante ba Polítika ministériu nian maka, atu promove kualidade ensinu superiór ne’ebé di’ak atubele garante kualidade rekursu umanu ba sustentabilidade futuru nasaun Timor-Leste nian.

Haree ba polítika ida-ne’ebé presiza duni atu fó oportunidade ba sidadaun hotu-hotu iha direitu hanesan hodi asesu ba nivel edukasaun no oportunidade ne’ebé efikás atubele dezenvolve sira-nia an. Ne’eduni, Ministériu Ensinu Superiór, Siénsia no Kultura, liuhusi servisu hamutuk ho Sekretaria Estadu Igualdade kada tinan hodi promove asuntu igualdade jéneru no inkluzaun nian iha setór ensinu superiór, liuliu kestaun igualdade ba oportunidade no partisipasaun feto iha Ensinu Superiór.

Ho nune’e iha tinan 2024, Ministériu hakarak integra nia parseiru sira hanesan Instituisaun Ensinu Superiór Públiku/Privadu sira iha territóriu nasionál atu sai hanesan promotór ba asuntu igualdade jéneru iha Instituisaun Ensinu Superiór sira, atu nune’e estudante sira bele hetan sira-nia direitu ba oportunidade.

Objetivu seluk husi programa ida-ne’e maka atu institusionaliza asuntu igualdade jéneru ba Instituisaun Ensinu Superiór sira hotu iha Timor-Leste, atu promove asuntu jéneru iha sira-nia Instituisaun, liuliu iha ambiente, asesu ba oportunidade, no liberdade espresaun no asuntu seluk tan ne’ebé maka bele fó biban ba estudante/dosente sira hotu atubele espresa sira-nia abilidade no hetan esperiénsia ne’ebé bele uza ba sira-nia futuru.

Ministériu Ensinu Superiór, Siénsia no Kultura hakarak loke konkursu públiku ba Instituisaun Ensinu Superiór sira iha Timor laran tomak, hodibele hato’o no aprezenta planu atividade ida ne’ebé mak implementa ona ou iha prosesu implementasaun ligadu ho asuntu jéneru iha sira-nia Instituisaun.

Nune’e, atividade konkursu ida-ne’e ho tema -“Dalan ba Igualdade”, ho objetivu prinsipál maka :

  • Promove atividade igualdade jéneru iha Instituisaun ensinu superiór sira;
  • Promove kapasitasaun no domíniu iha asuntu igualdade jéneru;
  • Promove liberdade oportunidade no kritividade atu elabora programa dezenvolvimentu ba asuntu igualdade jéneru;
  • Kontribui atu hadi’a polítika nasionál kona-ba kestaun igualdade jéneru ;
  • Instituisaun ensinu superiór sira, promove integrasaun, inkluzaun no kualidade rekursu umanu iha instituisaun nian laran;
  • Partilla koñesimentu no esperiénsia ne’ebé hetan ona ho parte seluk.

No objetivu jerál maka:

  • Ezekuta Boas Práticas hodi implementa Igualdade Jéneru iha Instituisaun Ensinu Superiór sira, ho nia impaktu pozitvu liuhusi atividade iha Universidade/Institutu sira no ba Komunidade;  
  • Institusionaliza asuntu jéneru ba Instituisaun Ensinu Superiór sira iha Timor-Leste;
  • Halo asuntu jéneru sai asuntu komún entre instituisaun ensinu superiór sira hotu;
  • Promove liberdade, oportunidade no espresaun ba komunidade akadémika atu espressa sira-nia abilidade;
  • Kria liña networking asuntu jéneru entre Ministériu ho nia parseiru sira atubele reforsa liután promosaun ba asuntu jéneru nian iha futuru.

Kritériu sira

Kritériu Proposta: Konkursu ida-ne’e sei loke de’it ba Instituisaun Ensinu Superiór sira-ne’ebé mak eziste iha Timor-Leste. No Instituisaun Ensinu Superiór ida-idak sei submete de’it proposta ne’ebé ho kritériu sira hanesan tuirmai ne’e:

  • Tema ´´Dalan ba Igualdade“
  • Proposta sei aborda kona-ba importánsia no mekanizmu implementasaun asuntu igualdade jéneru iha Instituisaun Ensinu Superiór ida-idak;
  • Instituisaun Ensinu Superiór ida-idak sei dezenvolve proposta bazeia ba kada planu no programa husi referente instituisaun ne’e rasik;
  • Proposta ne’ebé mak hakerek tenke define klaru ninia planu no programa ne’ebé mak sei implementa no ida-ne’ebé mak hala’o tiha ona (karik eziste);
  • Dokumentus ba proposta nian tenke hetan sertifikasaun no asinatura husi hakerek na’in sira, inklui hetan sertifikasaun husi responsavel máximu estrutura Instituisaun Ensinu Superiór sira nian (Reitór, vise-reitór ou dekanu sira ne’ebé maka toma konta asuntu jéneru iha Instituisaun Ensinu Superiór sira)
  • Sei prienxe no submete fixa informativa husi proposta-na’in, no tenke hetan sertifikasaun husi Instituisaun Ensinu Superiór (Responsavel Prinsipál Tenke Reprezentante sira ne’ebé hola parte iha Estrutura akadémika, Reitór, Vise-Reitór, Dekanu ka sira-ne’ebé hola parte iha estrutura ezekutiva Instituisaun nian, liuliu kona-ba asuntu jéneru nian (karik iha)
  • Submete hamutuk ho dokumentu identifikasaun sira husi responsavel prinsipál ba proposta;
  • Proposta sei submete direta mai iha Gabinete Diresaun Jerál Planeamentu no Finansas (DGPF) ou bele liuhusi Email: info.rp.MESCC@gmail.com no info.rp.mescc@mescc.gov.tl ho CC. Ba julioguterres39@gmail.com

Kritériu Obrigatóriu Responsavel Aplikante: Aplikante tenke hola parte iha Estrutura akadémiku nian, ne’ebé mak sai mós hanesan responsavel ba toma desizaun iha Instituisaun Ensinu Superiór ne’ebé mak nia reprezenta ba, ho nia kritériu dokumentu sira-ne’ebé submete hamutuk tuirmai ne’e:

  • Kartaun Eleitorál no BI;
  • Kartaun Funsionáriu husi Universidade/Institutu;
  • Karta rekomendasaun husi Universidade ne’ebé rekomenda katak referente Kandidatu mak reprezenta Intituisaun no disponivel atu tuir konkursu no viajen durante períodu programa ne’e la’o (Tenke asina husi Reitór)
  • Pasaporte tenke válidu, mínimu fulan hitu (7)

Durasaun Konkursu

  • Sorumutu tékniku ho MESSK no SEI hodi diskute kona-ba Implementasaun no Kompozisaun Júri: 05 Jullu 2024;
  • Sorumutu tékniku ho Universidade Sira: 05 Jullu 2024;
  • Publikasaun Anúnsiu Publisidade: 05 Jullu 2024;
  • Submisaun Dokumentus no Proposta (Direta & Online): 8 to’o 21 Jullu 2024;
  • Avaliasaun Dokumentus: 23 – 25 Jullu 2024;
  • Publiksaun Rezultadu: 26 Jullu 2024;
  • Preparasaun Administrativa ba Viajen: 29 Jullu – 16 Agostu 2024;
  • Formasaun iha Bali (Inklui data partida no Regresso): 18 – 23 Agostu 2024 (Totál Loron 5);
  • Aprezentasaun Relatóriu husi Manán-Na’in sira: 29 Agostu 2024;

Rezultadu, Rekoñesimentu no Obrigasaun

  1. Sei selesiona de’it manán-na’in (Na’in 2): husi Instituisaun Ensinu Superiór rua (2), ne’ebé mak ho proposta bazeia ba kualidade husi Planu no Atividade ne’ebé implementa iha Universidade/Institutu rasik, ne’ebé mak Ministériu sei fó rekoñesimentu hanesan tuirmai ne’e:
  2. Study Tour ba Universidade Warmadewa Bali Indonézia durante loron tolu (3): Hodi aprende kona-ba Konseitu no boas práticas, igualdade jéneru iha universidade refere ho nia implementasaun no impaktu ba iha Universidade no Sosiedade.
  • Sertifikadu Apresiasaun: Ministériu sei oferese sertifikadu apresiasaun hodi rekoñese  kualidade husi konkorente sira no Universidade sira-ne’ebé mak sei sai mós hanesan ezemplu di’ak (Brand Embaissador MESSK nian ba Asuntu Jéneru nian) iha atividade implementasaun Igualdade Jéneru tuirmai.
  • Obrigasaun: Hafoin termina vizita-estudu sei iha períodu semana ida atu manán-na’in sira aprezenta relatóriu kona-ba atividade vizita estudu nian, ninia konteúdu sei inklui mós ho rekomendasaun bazeia ba rezultadu estudu ne’ebé maka iha ho kondisaun Instituisaun Ensinu Superiór Timor-Leste nian.

Ekipa júri ba konkursu ne’e sei komposta husi:

  1. Tékniku husi Komisaun Organizadora MESCC (Kritériu sira Konkursu nian)
  2. Reprezentante husi Diresaun Jerál Ensinu Superiór (Konteúdu no Tipu Proposta)
  3. Reprezentante husi Sekretaria Estadu ba Igualdade (Konseitu Igualdade Jéneru ho nia Prespetiva sira)

Avaliasaun

Métodu Avaliasaun sei hala’o ho meius fechado entre ekipa júri sira tuir kritériu sira-ne’ebé mak indika ona, ho valór ka pontus persentajen hanesan tuirmai:

  1. Tékniku husi Komisaun Organizadora MESCC (Kriterius de Konkursu) ho valór 20%

Sei halo Avaliasaun ba Kritérius Adminstrativas, ne’ebé kondís ho kritérius ba Konkursu nian, hodi garante efisiénsia no efikásia husi konkursu ida-ne’e nian;

  • Reprezentante husi Diresaun Jerál Ensinu Superiór (Konteúdu no Tipu Proposta) ho nia valór 40%

Sei foka ba konteúdu, hodi haree liu ba konseitu planu no atividade ne’ebé mak sei implementa husi Universidade sira, kondís ho metas no objetivu Ministériu nian ba Implementasaun Asuntu ida-ne’e nian;  

  • Reprezentante husi Sekretaria Estadu ba Igualdade (Konseitu Igualdade Jéneru ho nia Prespetiva sira) ho nia valór 40%

Sei foka ba Asuntu Jéneru no impaktu sira-ne’ebé mak defini iha kada proposta nian, atu hetan konsiderasaun ba efeitu implementasaun ne’ebé mak kondís no afavór ho situasaun Timor-Leste liuliu impaktu no nia benefísiu sira.

Termus Kondisaun no Aseitasaun

Termus Kondisaun

  • Sei la konsidera no esklui proposta ne’ebé la refleta no ses husi asuntu no tema;
  • Sei esklui automátika proposta sira-ne’ebé mak ekipa identifika plájiu;
  • Sei la konsidera proposta sira-ne’ebé la bazeia ba kritériu sira-ne’ebé mak komisaun identifika;
  • Oportunidade ba formasaun sei oferese de’it ba responsavel proposta ne’ebé maka indika husi Instituisaun ensinu superiór sira, konforme ho dokumentu ne’ebé mak submete mai Ministériu.

Termus Aseitasaun

  • Proposta sira-ne’ebé mak selesionadu sei sai hanesan propriedade Ministériu nian, nune’e ministériu iha direitu tomak atu utiliza dokumentu sira-ne’e ba nesesidade Ministériu nian.
  • Manán-na’i sira tenke implementa programa ne’ebé define iha proposta atu aplika iha sira nia Instituisaun hafoin formasaun hotu, atu nune’e promove asuntu jéneru iha sira-nia Instituisaun ida-idak,
  • Aseita katak sei iha disponibilidade tomak atu atende períodu formasaun to’o remata no kualkér asuntu ne’ebé iha relevánsia ho programa ida-ne’e;
  • Aseita katak sei kontinua atu sai hanesan pontu-fokál ba asuntu jéneru nian hamutuk ho Ministériu hodi promove atividade jéneru iha programa ne’ebé mak sei realiza husi ministériu iha futuru.

𝐍𝐨𝐭𝐚:
– 𝐏𝐫𝐨𝐩𝐨𝐬𝐭𝐚 𝐬𝐞𝐢 𝐡𝐚𝐤𝐞𝐫𝐞𝐤 𝐡𝐨 𝐥𝐢𝐚𝐧 𝐓𝐞𝐭𝐮𝐧
– 𝐄𝐧𝐤𝐨𝐫𝐚𝐣𝐚𝐦𝐞𝐧𝐭𝐮 𝐦𝐚𝐤𝐚’𝐚𝐬 𝐩𝐚𝐫𝐭𝐢𝐬𝐢𝐩𝐚𝐬𝐚𝐮𝐧 𝐫𝐞𝐬𝐩𝐨𝐧𝐬𝐚𝐯𝐞𝐥 𝐅𝐞𝐭𝐨 𝐢𝐡𝐚 𝐊𝐨𝐧𝐤𝐮𝐫𝐬𝐮 𝐢𝐝𝐚 𝐧𝐞’𝐞.

0Shares