by 
Likisa, S. Exa. Ministru Ensiu Superiór, SIénsia no Kultura, Dr. José Honório, sai nudar Prezidente ba Serimónia Isar bandeira Nasional, ba Selebrasaun loron nasional Proklamasaun Independensia 28 Novembro, ba dala 49, ne’ebé mak realiza iha Munisipiu Likisa Villa.
Iha sesaun serimónia ofisial ne’e, S. Exa. Ministru Akopañadu husi Prezidente Autoridade Munisipiu Likisa, Dr. Paulino Ribeiro. Hamutuk, ho dirijentes ezekutivus sira husi Instituisaun Seguransa, Edukasaun, Komunidade sira no mos reprezentantes husi Instituisaun relevantes sira seluk ne’ebé mak prezente mos iha atividade refere.
S. Exa. Ministru iha nia pozisaun wainhira prossede minutu silensiu durante prossesu serimónia, hodi husu ba iha partisipantes sira hotu, atu bele fo homenagem ba heróis sira hotu ne’ebé mak sakrefika ona na hodi determina Timor-Leste nia destinu, ho nuene’e S. Exa. Ministru destaka katak ´´Mai ita fo homenagem ba ita nia Heroi sira husi Prezidente Nicolau Lobato, Francisco Xavier do Amaral no Herois sira hotu, ne’ebé mak fo ona sira na hodi konkista ita nia ukun rasik an, no fo ona mahon mai ita hotu atu hetan liberdade hodi kontinua ita nia dezenvolvimentu Nasional“.
Ba ambitu selebrasaun loron nasional ne’e rasik, kompostu husi ajenda no atividade oi-oin ne’ebé mak antes ne’e realiza uluk ona hahu husi Loron 27 novembro 2024, realiza ona atividade sira hanesan: Selebrasaun Eukaristia Missa iha Igreija Munisipiu Likisa, hodi fo homenagem ba iha Herois sira. No hafoin de Missa, S. Exa. Ministru hamutuk ho Autoridade lokal, sobreviventes sira, veteranos, funsionarius no komunidades sira, kontinua ba tau ai-funan iha semiteriu Jardin Herois Munisipiu Likisa nian. Hafoin de atividade sira ne’e, kontinua atividade Sosializasaun ba Estudante Ensinu Sekundariu, ne’ebé mak lidera husi Xefe Gabinete Ministru MESSK, Sr. José Boavida ho nia ekipa, hodi socializa kona-ba programas no atividade sira Ministériu nian, liu-liu ba bolso estudo no programa sira seluk tan ne’ebé mak bele benefisia ba iha joven sira. Sesaun ikus ba atividade sira ne’ebé realiza iha loron refere, termina ho atividade kultural tarabandu ne’ebé mak realiza husi Lia nain, kultura Minisipiu Likisa nian.
Portanto, hafoin de serimónia sonele ba isar bandeira nasional nian, harame mos ho atividade sira seluk hanesan, animasaun musical ho musika tradicional no instrumental tradicional munisipiu likisa nian, feira tradicional ho artezenatos no produtos tradicional sira, inklui mos ho dansas tradicional sira, ne’ebé mak harame atividade refere.
Atividade selebrasuan loron nasional ne’e, hetan entusiamo no partisipasaun maximu husi Komunidade sira, hamutuk ho autoridade lokal no Partisipasuan husi Ekipa Ministériu nian, ne’ebé mak demostra husi loron 27 to iha loron 28 novembro 2024, ba iha serimónia solene nian, to remata.
