by 
Seul, 18 Setembru 2024: S. Exa. Ministru Ensinu Superiór, Siénsia no Kultura, Dr. José Honório, akompanãdu husi Diretora Jeral Ensinu Superiór no Siénsia, Sra. Maria Filomena Lay Guterres, hamutuk ho nia delegasaun hola parte iha eventu selebrasaun aniversáriu HWPL (Heavenly Culture World Peace Restoration of Light), ba dala 10º nian, ne’ebé mak realiza iha Seul, Coreia do Sul, hamutuk ho partisipantes sira seluk husi total nasaun hamutuk 122.
Tema ba iha Eventu refere maka ´´Kria Komunidade Paz Mundial liuhusi Kolaborasaun Rejional“, ho nia objetivu atu fó oportunidade ba lider husi pais membru sira hodi diskuti estratéjia husi pasadu no futuru hodi promove harmonia global nian. Aleinde ne’e objetivu seluk husi delegasaun MESSK nian liuhusi prezensa S. Exa. Ministru nian, atu hodi hatudu komitmentu Timor-Leste nian atu promove kultura Paz liuhusi edukasaun hodi aliña ho misaun husi HWPL nian ba iha individu ida-ida hodi promove paz ba iha nível sira hotu.
Iha sesaun eventu ne’ebé mak realiza ho diversus atividade ida ne’e, S. Exa. Ministru Ensinu Superiór, Siénsia no Kultura sai mos hanesan palestrante hodi expressa iha nia diskursu nudar reprezenta governu Timor-Leste, afirma katak iha Timor-Leste Ministériu ho instituisaun ensinu superiór ualu halo parseria ho HWPL hodi introdús edukasaun dame iha rai-laran: “Ha’u fiar katak edukasaun dame nian sei hala’o papél krusiál ida, la’ós de’it hanesan matéria simples ida, maibé hodi ajuda estudante sira atu sai sidadaun globál sira iha futuru no hodi harii fundasaun ba dame no estabilidade iha sosiedade tomak.”
Aleinde ne’e, assegura mos ho partisipasaun S. Exa. Ministru nian iha serimonia Assinatura memorandu de entendimentu entre HWPL ho G7+ nian ne’ebé mak assinadu husi Sekretario Jeral G7+, Dr. Helder da Costa, hodi hasa’e kooperasaun hodi promove paz no estabilidade iha rejiaun sira ne’ebé afetadu husi konflitu. Foka mos ba kriasaun enkuadramentu kolaborativu ida hodi halo advokasia ba paz ne’ebé aliña ho Objetivu sira Dezenvolvimentu Sustentável (ODS), harii instituisaun sira ne’ebé iha kapasidade liuhosi esperiénsia sira ne’ebé fahe, fasilita prosesu diálogu no rekonsiliasaun nasionál, no hakbiit komunidade sira liuhusi inisiativa sira edukasaun ba Paz nian no aliansa estratéjiku ida-ne’e buka atu aproveita forsa sira hosi organizasaun rua ne’e nian hodi haburas paz no dezenvolvimentu sustentável iha estadu frajil sira.
Atividade ne’ebé mak ekipa delegasaun partisipa kompostu husi Simeira Selebrasaun 10º Aniversáriu HWPL, sorumutu kortezia ho Chairman HWPL, Sr. Lee Man-hee, hodi koalia kona-ba Planu ba fututu implementasaun promosaun ba Edukasaun Paz iha Timor-Leste nian.
Portanto, antes ne’e loron 15 jullu 2024, Ministériu Ensinu Superiór, Siénsia no Kultura, rasik realiza ona assinatura MOU ho HWPL, inklui mos Instituisaun Ensinu Superiór balun, ho objetivu atu promove edukasaun ba Paz hodi, fó kbiit ba sidadaun timoroan sira atu kontribui ba ambiente ne’ebé hakmatek no kolabora iha inisiativa sira ne’ebé reforsa valór sira sidadania no inkluzaun nian.
