S. EXA. MINISTRU ENSINU SUPERIÓR, SIÉNSIA NO KULTURA PARTISIPA IHA VIII KONGRESU INTERNASIONÁL KONA-BA EDUKASAUN AMBIENTAL CPLP IHA BRASIL

Manaus, Brasil, loron 21 to’o 25 fulan Jullu 2025 – S. Exa. Ministru Ensinu Superiór, Siénsia no Kultura Timor-Leste, Sr. José Honório, partisipa iha VIII Kongresu Internasionál kona-ba Edukasaun Ambientál hosi CPLP, ne’ebé hala’o iha sidade Manaus, Brasil.

S.E. Ministru José Honório partisipa iha kongresu refere reprezenta S. Exa. Vice-Primeiru-Ministru, Minstru Koordenadór Asuntus Ekonómikus no Ministru Turizmu no Ambiente Timor-Leste nian.

Ho tema “Edukasaun Ambientál no Asaun Lokal: resposta ba emerjénsia klimátika, justisa ambientál, demokrasia no moris di’ak”, kongresu ne’e iha partisipante sira hamutuk 1.600, ne’ebé mai husi estadu-membru sira CPLP no Galiza. Objetivu kongresu ne’e mak atu hamutuk hanoin no diskuti kona-ba dezafiu ambientál sira, ho enfaze ba edukasaun ambientál hanesan instrumentu transformasaun sosiál no mós atu hatán ba krise klimátika iha nivel globál.

Iha serimónia abertura, partisipa mós membru Governu husi paízes CPLP nian, liu-liu Ministra Meiu Ambiente no Mudansa Klima husi Brasil, Ministra Ambiente husi Angola, no Sekretáriu Estadu ba Rai no Ambiente husi Moçambique, no mos reprezentante governamentál no akadémiku sira seluk.

Partisipasaun Timor-Leste iha kongresu ne’e hatudu kompromisu forte husi Governu atu promove dezenvolvimentu sustentável, justisa klimátika no kooperasaun internasionál iha CPLP.

Iha nia intervensaun, S.E. Minstru José Honório salienta importánsia husi edukasaun ambientál iha nivel ensinu superiór, no papel komunidade lokál sira iha konstrusaun futuru ida ne’ebé justu no reziliente kontra mudansa klimátika sira.

Akompaña S. Exa. Ministru, Embaixadora RDTL iha Brasil, 3.ª Sekretária husi Embaixada, Adidu ba Edukasaun iha Brasil, tekniku sira Ministeriu Ambiente no asesor.