S. EXA. MINISTRU ENSINU SUPERIOR, SIÉNSIA NO KULTURA HALA’O VIZITA BA INSTITUTU FEDERAL BRASÍLIA – CAMPUS PLANALTINA

Brasília, 28 fulan Jullu 2025 – S. Exa. Ministru Ensinu Superior, Siénsia no Kultura, Sr. José Honório, akompaña husi S. Exa. Embaixadora RDTL iha Brasil, hala’o vizita ofisiál ba Institutu Federal de Brasília – Campus Planaltina, ho objetivu atu observa kondisaun funsionamentu instituisaun ne’e, ne’ebé hanorin kursus iha área agrikultura no produsaun animál, hodi nune’e bele diskuti oportunidade kooperasaun iha futuru.

Delegasaun ne’e, simu diretamente husi Diretór-Jerál Kampus Planaltina, Sr. Nilton Cometti, ne’ebé halo aprezentasaun kona-ba organizasaun no funsionamentu Institutu ne’e no halo mós vizita ba departamentu sira, liu-liu ba setór produsaun animál (bovinu, suínu no kaprinu) no agrikultura mekanizadu ho presizaun.

Akompaña mós vizita ne’e, tékniku diplomata sira husi Embaixada RDTL iha Brasil, Diretór Ezekutivu FDCH, Adidu Edukasaun, Asistente Adidu, tékniku no asesór sira.