by 5 to’o 7 Janeiru 2026 — S. Exa. Ministru Ensinu Superiór, Siénsia no Kultura, akompaña husi delegasaun husi Ministériu Ensinu Superiór, Siénsia no Kultura (MESSK), hala’o misaun ofisiál ida ba Indonézia ho vizita ba Jember no Surabaya, hodi hametin kooperasaun internasionál ba dezenvolvimentu ensinu superiór iha Timor-Leste, liuliu iha área siénsia no teknolojia.
Iha Jember, delegasaun vizita Institutu Siénsia no Teknolojia Mandala, enkuantu iha Surabaya hala’o enkontru institusionál ho Universidade Estatál Surabaya (UNESA).
Enkontru sira-ne’e rezulta iha entendimentu ba implementasaun programa konjuntu sira iha área investigasaun, bolsas estudu, interkámbiu dosente no estudante sira, no formasaun profesór sira, ne’ebé aliñadu ho prioridade estratéjika sira ne’ebé define husi MESSK.
Hanesan rezultadu imediatu, Timor-Leste hetan posibilidade atu asesu ba:
- 100 bolsas estudu (lisensiatura, mestradu no doutoramentu) ne’ebé oferese husi UNESA;
- 20 bolsas estudu (lisensiatura no mestradu) ne’ebé oferese husi Institutu Siénsia no Teknolojia Mandala, iha área informática, saúde no ekonomia.
Misaun ida-ne’e sai hanesan pasu ida tan ba hametin parseria entre Timor-Leste no Indonézia iha área ensinu superiór, no kontribui ba formasaun rekursus umanus kualifikadus no ba dezenvolvimentu siéntífiku no teknolójiku iha ita-nia nasaun.
English 
Portuguese