Biografia Ministru Ensinu Superior, Siénsia no Kultura, Longuinhos dos Santos, L.Ec.MM
Longuinhos dos Santos moris iha Munisípiu Bobonaru, Postu Administrativu Maliana, iha loron 4 Julhu 1974. Iha períodu tinan 1982 to’o 1991, frekuenta Ensinu Primáriu no Ensinu Pré-Sekundáriu (SMPN 2), iha Maliana, no remata Ensinu Sekundáriu Públiku (SMEA), iha Munisipiu Liquisa, iha tinan 1994. Durante prosesu libertasaun, la bele kontinua nia estudu maibé hala’o servisu, ho naran kódigu rezisténsia ELEZON, iha rede klandestina to’o momentu hahú Referendu, iha tinan 1999. Iha tinan 2001, hahú hikas nia estudu iha Universidade Nasionál Timor Lorosa’e, iha Fakuldade Ekonomia, Kursu Ekonomia no Jestaun, ne’ebé remata iha tinan 2007.
Iha períodu 2010 no 2011, hala’o estudu Mestradu nian iha área Ekonomia no Jestaun husi Universidade Kristen Satya Wacana (UKSW) Sala Tiga, Indonézia. Iha tinan 2012, hahú hala’o ninia kna’ar hanesan Dosente permanente iha Fakuldade Ekonomia no Jestaun – Universidade Nasionál Timor Lorosa’e (UNTL) , no asumi mós pasta hanesan Vise-Dekanu iha Departamentu Komérsiu no Turismu nian.
Aleinde envolvimentu iha kna’ar ne’ebé temi iha leten, envolve mós iha kareira profisionál seluk hanesan tuir mai ne’e:
- Membru Komisaun Diálogu ba Reintragasaun Komunitária iha Bebonuk (2006);
- Vice-Prezidente Órgaun Konsellu Fiskál Federasaun Desportu Akadémika Timor-Leste (2013);
- Koordenadór ba Fakuldade Ekonomia no Jestão iha UNTL hodi servisu hala’o peskiza ho parseiru husi Ministériu Komérsiu Indústria no Ambiente (2014);
- Orientadór Debate Públiku kona-ba Jéneru iha nível Fakuldade (2015);
- Fundadór Partidu Libertasaun Popular (2015), iha ne’ebé ezerse funsaun hanesan Primeiru Vise-Koordenadór Munisipiu Díli no membru Komisaun Juridika Nasionál (2017-2022); .
- Prezidente Komisaun Organizadora Akadémika nian (2016);
Iha 2017, partisipa iha reuniaun Trilateral Round Table entre Austrália, Timor-Leste no Indonézia, iha Charles Darwin University. Simu posse husi S. Exa. Prezidente Repúblika, iha loron 22 fulan Juñu tinan 2018, hodi asumi kna’ar hanesan Ministru Ensinu Superiór, Siénsia no Kultura, iha VIII Governu Konstitusionál, ba períodu 2018-2023.