by Dili, 19 Dezembru 2025: Ministériu Ensinu Superiór, Siénsia no Kultura, liuhosi Komisaun ba Asesu Ensinu Superiór (CAES), halo abertura ba Koresaun Prova ba Kandidatu sira-ne’ebé hakarak atu tama iha Ensinu Superiór Públiku, UNTL no IPB, ba tinan akadémiku 2026.
Implementasaun atividade ida-ne’e bazeia ba Diploma Ministeriál nº. 20/2025, 9 Jullu nian, kona-ba “Asesu no Ingresu ba Ensinu Superiór Públiku UNTL no IPB”, ho kooperasaun ho servisu kompetente sira hosi UNTL, IPB, Ministériu Solidariedade Sosiál, Ministériu Administrasaun Estatál, Ministériu Edukasaun no Konsellu Kombatentes Libertasaun Nasionál (CCLN).
Totál kandidatu sira-ne’ebé inskreve atu asesu ba IES públiku liuhosi Rejime Espesiál, hamutuk 1.688. Hosi númeru totál ne’e kompostu husi Feto hamutuk 1.180 no Mane hamutuk 508.
Abertura simbólika ida-ne’e, ofisialmente lansa hosi S. Exa. Ministru Ensinu Superiór, Siénsia no Kultura, Dr. José Honório, akompaña hosi Diretóra-Jerál Ensinu Superiór no Siénsia, Diretór-Jerál Planeamentu no Finansas, Inspetór Jerál, no partisipa hosi Reitór no Vise-Reitór UNTL, reprezentante Prezidente IPB, Koordenadór Gabinete Ministériu Edukasaun, Membru KAES no Dirijente, Tékniku no Funsionáriu sira hosi MESSK.
#Media_MESSK
English 
Portuguese