by 
Dili, 08/01/2025: Ministériu Ensinu Superior, Siénsia no Kultura (MESCC, sigla iha lian Portugés), liu husi nia Direção Nasionál Ensinu Superior (DNES), iha loron hirak liu ba, realiza serimónia ofisiál abertura koreksaun bulletin pontus izame ba kandidatus rezime spesial no fixa eskola ba Departamentu Rezime Jeral hodi prosesu asesu ba Ensinu Superior Públiku (IESP: UNTL & IPB) ba tinan akademiku 2025. Serimónia abertura koreksaun bulletin ne’e hala’o iha Salão Reuniaun MESCC, Kolmera-Dili, no loke ofisialmente husi Sua Exelénsia Ministru Ensinu Superior, Siénsia no Kultura, Dr. José Honório.
Iha nia intervensaun ba Komisaun Asesu Ensinu Superior (CAES), Sua Exelénsia Ministru hato’o katak ekipa Komisaun tenki serbisu di’ak no rigorózu atu asegura katak prosesu koreksaun bulletin pontus bele lao di’ak tuir rekezitu ne’ebé establisé ona husi Komisaun (CAES). Ministru mos fo hanoin katak ba kandidatura sira ne’ebé hakarak kontinua sira nia nivel edukasaun iha Ensinu Superior, tenki tuir teste. Liu hosi teste mak bele seleisiona kandidatus ne’ebé prienxe rekezitu hodi hetan asesu ba Ensinu Superior Públiku (UNTL & IPB).
Iha nia intervensaun, Dr. José Honório sita mos katak Lei Ensinu Superior mos fó dalan ba sidadáun Timor oan sira ne’ebé hakarak hasa’e sira nia nivel edukasaun, husi nivel diploma to’o lisensiatúra.
Iha parte seluk, Diretora Jeral Ensinu Superior no Siénsia, Sra. Maria Filomena Lay Guterres, ne’ebé mos hanesan prezidente Komisaun Asesu Ensinu Superior (CAES), hato’o nia agradesimentu ba komponente hotu ne’ebé marka nia prezensa iha serimónia ida ne’e, liu-liu ba representante sira hosi Ministérius relevantes no instituisaun sira hanesan F-FDTL no PNTL. Magnífiku Reitor UNTL, Dr. João Soares Martins, no Presidente IPB, Dr. Acácio C. Amaral, mos marka prezensa iha serimónia abertura ne’e.
Sra. Maria Filomena Lay Guterres mos fó hatene katak rezultadu koreksaun bulletin pontus izame ba kandidatura (IESP: UNTL & IPB) sei anúnsia iha loron ikus fulan ida ne’e nia laran, tuir planu kalendarizasaun CAES nian.
Marka prezensa iha serimónia abertura ne’e hanesan Sua Exelénsia Ministru Ensinu Superior, Siénsia no Kultura, Dr. José Honório, Prezidente CAES, Sra. Maria Filomena Lay Guterres, Vice-Prezidente CAES, Sr. Higino Alves, Prezidente CCLN, Sr. Vidal de Jesus – Riak Leman, Representante Ministériu Edukasaun, Sr. Jeremias Gomes, Magnífiku Reitor UNTL, Dr. João Soares Martins, Presidente IPB, Dr. Acácio C. Amaral, Representante F-FDTL, Sr. Coronel Domingos do Camara, Representante PNTL, Diretores Nasionál Ministériu Ensinu Superior no ekipa tékniku Komisaun Asesu Ensinu Superior (CAES).
