Prosesu Asesu ba Ensinu Superiór Públiku ba estudante foun tinan akadémiku 2026, ne’ebé implementa ona husi Ministériu Ensinu Superiór, Siénsia no Kultura (MESSK), Universidade Nasionál Timor Lorosa’e (UNTL) no Institutu Politékniku Betano (IPB).
Prosesu ida ne’e hahú ho aprovasaun Diploma Ministeriál (Diploma Ministeriál N.º 20/2025 de 09 de Jullu, liuhosi Diploma ne’e fó kompeténsia ba Comissão Coordenadora de Acesso ao Ensino Superior (CAES) hodi responsabiliza ba atividade hotu-hotu relativa ba Asesu Ensinu Superiór públiku. Komisaun ne’e kompostu hosi elementu MESSK, UNTL no IPB. Komisaun ne’e, koordena ho Ministériu relevante sira hanesan ME, MSSI, MAKLN no MAE, no lidera prosesu diseminasaun informasaun iha munisípiu hotu-hotu kona-ba rejime asesu, rekizitu sira ba admisaun, faze no kalendáriu ba implementasaun no númeru vaga ne’ebé disponível ba estudante sira hodi bele asesu ba Ensinu Superiór públiku.
Ho objetivu atu promove prinsípiu igualdade kona-ba oportunidade no respeitu ba diferensa, nune’e estabelese rejime rua hodi asesu ba Ensinu Superiór Públiku:
- Rejime Jerál: fó oportunidade ba finalista husi ensinu sekundáriu jerál no ensinu sekundáriu tékniku vokasionál tinan 2025;
- Rejime Espesiál: fó oportunidade ba kandidatu sira ne’ebé maka sei iha situasaun exsesionál.
Hafoin realiza prosesu asesu ba ensinu superiór públiku ba tinan 2026, MESSK ohin anúnsia, ho forma jerál, rezultadu finál ba Rejime rua:
- Rejime Jerál kompostu husi:
Finalista husi ensinu sekundáriu jerál (ESJ) no ensinu sekundáriu tékniku-vokasionál (ESTV). Ho rezultadu finál mak hanesan tuir mai:
- Númeru Totál Estudante Finalista sira husi ESJ no ESTV–27.698 fahe ba Ensinu Sekundáriu Jerál (24.168) no Ensinu Sekundáriu Tékniku Vokasionál (3.530);
- Númeru Totál Estudante Finalista sira husi ESJ no ESTV ne’ebé prienxe Boletim – 11.725 fahe ba Ensinu Sekundáriu Jerál (9.534) no Ensinu Sekundáriu Tékniku Vokasionál (2.191);
- Númeru Estudante finalista sira husi ESJ no ESTV ne’ebé admitidu ba Ensinu Superiór públiku (UNTL no IPB), liuhusi Rejime Jerál – 4.701
- ESJ – 3.856 (inklui ona kandidatu 144 ne’ebé hetan kualifikasaun di’ak liu husi kada munisípiu).
- ESTV – 881 (inklui ona 62, ne’ebé hetan kualifikasaun di’ak liu iha nível nasionál).
- Númeru Estudante finalista sira husi ESJ no ESTV ne’ebé priense boletin maibe la admitidu ba Ensinu Superiór públiku, liuhusi Rejime Jerál – 7.024
2. Rejime Espesiál kompostu husi:
Oportunidade – fó biban ba sidadaun timoroan sira ne’ebé maka remata ona ensinu sekundáriu iha tinan ha’at (4) ba kotuk. Ho rezultadu finál mak hanesan tuir mai:
- N.º total husi Kandidatu sira –1.186;
- N.º Kandidatu sira ne’ebé tuir Ezame – 1.001;
- N.º Kandidatu sira ne’ebé la tuir Ezame – 185;
- N.º Kandidatu sira ne’ebé admitidu ba UNTL no IPB – 571;
- N.º Kandidatu sira ne’ebé la iha kolokasaun (la admitidu) ba Ensinu Superiór Públiku – 430;
Veteranu sira no Veteranu no Mártir sira nia oan – fó biban ba Veteranu no Veteranu sira no Mártir nia oan. Ho rezultadu finál mak hanesan tuir mai:
- N.º total husi Kandidatu sira – 162;
- N.º Kandidatu sira ne’ebé tuir Ezame – 151;
- N.º Kandidatu sira ne’ebé la tuir Ezame – 11;
- N.º Kandidatu sira ne’ebé Admitidu ba UNTL no IPB – 101;
- N.º Kandidatu sira ne’ebé la iha kolokasaun (la admitidu) ba Ensinu Superiór Públiku – 50;
Hakbi’it – fó biban ba família kbi’it laek sira-nia oan. Ho rezultadu finál mak hanesan tuir mai:
- N.º total husi Kandidatu sira – 284;
- N.º Kandidatu sira ne’ebé tuir Ezame – 261;
- N.º Kandidatu sira ne’ebé la tuir Ezame – 23;
- N.º Kandidatu sira ne’ebé admitidu ba UNTL no IPB – 154;
- N.º Kandidatu sira ne’ebé la admitidu – 107;
Kategoria sira seluk hosi Rejime espesiál ne’ebé hala’o prosesu selesaun dokumentu de’it mak hanesan tuir mai:
EMA HO DIFISIENSIA (EHD), FILHO DIPLOMATA, ENSINU SUPERIÓR, F-FDTL, PNTL, RESIDENTE MUNISIPIU, DESPORTIVAS, ho nia totál kandidatu ne’ebé admitidu ba UNTL no IPB hamutuk – 138;
NÚMERU TOTÁL KANDIDATU SIRA NE’EBÉ ADMITIDU ba UNTL no IPB
| INSTITUISAUN | TOTAL |
| UNTL | 5.358 |
| IPB | 343 |
| TOTAL | 5.701 |
Ikus liu, Ministériu Ensinu Superiór, Siénsia no Kultura informa katak rezultadu finál, hanesan lista ho naran kandidatu sira ne’ebé “Admitidu”, sei divulga liuhusi Website hanesan:
- Website Ministériu Ensinu Superior, Siénsia no Kultura (http://mescc.gov.tl).
- Website Universidade Nacional Timor Lorosa’e (www.untl.edu.tl).
- Website Instituto Politécnico de Betano (www.ipb.edu.tl)
- Pájina Facebook Ofisial MESCC, UNTL no IPB.
Download lista ofisial Kandidatu sira ne’ebé admitidu iha link kraik:
Obrigadu barak ba ita bo’ot nia atensaun.!
English 
Portuguese