by 
Díli, 25/11/2024: Ministériu Ensinu Superiór, Siénsia no Kultura, servisu hamutuk ho Gabinete Palasiu Presidente, kontinua realiza atividade ba promosaun siénsia no teknolojia nia, ba ambitu programa SCI-TECH 2024, edisaun daruak nian, ne’ebé mak iha atividade atual, realiza kompetisaun Diskursu Publiku ho lian Portugués, destinadu ba iha Estudante husi Universitarius sira, ne’ebé mak realiza iha Salaun CNE, Díli.
Objetivu husi atividade ida ne’e, hanesan kontinuidade ida husi programa SCI-TECH Expo 2024 nian, hodi promove turismu liuhusi siénsia no teknolojia nian, ne’ebé mak hanesan Inisiativa mai husi S. Exa. Presidente Repúblika Timor-Leste, Dr- José Ramos Horta rasik. Parte prinsipal seluk maka, diskursu refere halo ho lian Portugués, ne’ebé mak hanesan mius ida atu hodi promove lian Portugués nudar lian ofisial Timor-leste nian, iha ensinu superiór sira. SCI-TECH rasik, envolve atividade oi-oin ne’ebé hahu kedas iha fulan Agosto liu ba organiza ona seminariu Internasional ida ne’ebé mak ho nia orador mai husi Premiadus sira ba area Siénsia no Teknolojia nian. Aleinde ne’e, organiza mos expozisaun, no previstu ba iha atividade tuir mai, sei realiza mos sertame ba estudante sira ba area hanesan.
Tema ba iha atividade ida ne’e maka, ´´Siénsia, Teknolojia no Inovasaun: Dalan ba Transformasaun no Dezenvolvimentu Sustentavel iha Timor-Leste“. Ho nia Sub tema ba iha diskursu nian mak hanesan: 1. Kapasitasaun iha Edukasaun Siénsia no Téknolojia, 2. Inovasaun Teknolojia no Emprendedorizmu iha setor Rural, no Insfraestrutura Dijital.
Total konkorentes ne’ebé mak sei tuir kompetisaun refere hamutuk nain 26, ne’ebé mak mai husi Instituisaun Ensinu Superiór hamutuk 14, iha Territoriu Nasional nian. Atividade refere sei realiza durante loron rua, ne’ebé mak hahu husi loron 25 to’o 26 Fulan Novembru 2024, ne’ebé konta ho partisipasaun husi ekipa júri ne’ebé kompostu husi formador Lingua Portugues Ministériu nian, inklui mos reprezentantes husi Palasiu Prezidente nian.
Atividade refere, loke direta husi Xefe Departamentu DNCT, hanesan reprezenta Diretora Nasional Siénsia no Teknolojia, Sra. Ana Viegas, no hetan partisipasaun husi, estudante no reprezentantes husi Instituisaun Ensinu Superior sira.
