by 
Malásia, 04/12/2024: Delegasaun Ministériu Ensinu Superior, Siénsia no Kultura (MESCC), lideradu husi S. Exa. Ministru Dr. José Honório, hamutuk ho asesores no tékniku sira husi ministériu, hala’o sorumutu ho estrutura Universidade Teknolojia Petronas (UTP) no Politékniku Ungku Omar (PUO), iha Perak, Malásia. Iha sesaun vizita refere, aleinde sorumutu ho estrutura, delegasaun MESCC mos hala’o vizita ba rekursus sira ne’ebé Instituisaun rua refere iha, hodi hatene konaba kualidade no kapasidade husi Instituisaun sira ne’e nian.
Objetivu sorumutu refere, ne’ebé lidera diretamente husi Ministru MESCC, mak atu buka kooperasaun estratéjiku, liu-liu iha área sira ne’ebé importante ba dezenvolvimentu Timor-Leste, tuir politika Estratéjika no Plano Dezenvolvimentu Nasional (PEDN), no mos atu aumenta kualidade Ensinu Superior, hodi garantia kualidade rekursus umanu ba futuru.
Iha reuniaun ho Universidade Teknolojia Petronas (UTP), diskute ona kooperasaun kona-ba akompaña progresu akademiku no integrasaun estudante bolseiru Timor oan sira iha UTP, no potensia atu kontinua haruka estudante Timor-Leste atu kontinua estudu iha área Engeñaria Petroléo, no área diversifikada ne’ebé hanesan mina no gas.
Nia sorin seluk, iha sorumutu ho Politékniku Ungku Omar (PUO), Ministru MESCC hetan konvite hodi vizita instalasaun teknika sira no diskute ba possibilidade atu promove mobilidade no interkambiu estudante iha área téknika hanesan Engeñaria, Teknolojia Informátika no Marina (Fisheries).
Sorumutu rua refere, fó importância ne’ebé estratéjiku ba Timor-Leste, liu-liu iha área mina no gas, ho foku principal ba dezenvolvimentu no preparação rekursu umanu kualifikadu atu responde ba desafius sira iha esplorasaun no manejamentu rekursu naturais sira nian. Tanba mundu ho lais evolui, diskuti mos nesesidade Timor-Leste atu adapta ba avansu teknologia modernu. Nudar parte ne’e, MESCC foku ba treinamentu no preparasaun teknika iha área Teknolojia Informátika hodi kontribui ba dezenvolvimentu nasional.
Iha sorumutu refere, S. Exa. Ministru Dr. José Honório, hamutuk ho Asesora Ezekutiva no Assesor husi UPC-MESCC, hala’o diskusaun direta ho estrutura no profesór sira husi Instituisaun rua refere.
