by 
Díli, 14/11/2024: Komisaun Kordenadora Universidade no Instituto (CUIS – Sigla iha Portugés) organiza sorumutu hodi halo atualizasaun no aprezenta relatoriu kona-ba visita estudu no monitorizasaun fundu subvensaun públiku nian. Atividade ne’e realiza hamutuk ho membru CUIS sira iha salaun MESSK, Colmera, Díli.
Sorumutu ne’ebé realiza durante loron ida refere, halao ho objetivo atu rona aprezentasaun husi kada ekipa delegasaun 6 ne’ebé iha fulan 3 liu ba halo visita estudu ba pais sira hanesan Malázia, Indonézia, Tailândia, Austrália, Portugal no Filipina, ba âmbito programa CUIS nian. Hanesan mos, rona aprezentasaun relatóriu husi ekipa monitorizasaun CUIS ne’ebé realiza monitorizasaun iha Instituisaun Ensinu Superiór Privadu 17, ne’ebé benefísia fundu subvensaun públika, hodi monitoriza ezekusaun fundu ida-ne’e iha kada IES.
Visita estudu ne’ebé ekipa CUIS halo iha programa sira hanesan kooperasaun ho instituisaun internasional sira iha diáspora, ho objetivo bele kooperar no servisu hamutuk ba implementasaun programas prinsipál CUIS nian, hanesan: estabelesimentu eskola pós-doutoramentu, estabelesimentu Sistema Nasionál Kualifikasaun, no programa sira seluk ne’ebé iha nia finalidade hodi hadia kualidade Ensinu Superiór Timor-Leste nian.
Alem de ne’e, iha sesaun aprezentasaun relatóriu monitorizasaun husi ekipa CUIS, hare progressu no ezekusaun fundu subvensaun públika ne’ebé transferida ba Instituisaun Ensinu Superior sira. Ho rezultadu husi aprezentasaun sira ne’e, sorumutu ne’e mos halo definisaun planu tuir mai ba asaun sira ne’ebé CUIS sei halo bazeia ba rezultadu relatóriu no aprezentasaun ekipa sira.
Sesaun sorumutu ida ne’e mos partisipadu husi Diretor Jeral Planeamentu no Finansas, Sr. Hernâni Viterbo da Costa Soares, Diretor Jeral Ensino Superiór no Siénsia, Sra. Maria Filomena Lay Guterres, hamutuk ho membru CUIS sira seluk no tékniku sira husi MESSK rasik.
