𝗗𝗶𝘀𝗸𝘂𝗿𝘀𝘂 𝗵𝘂𝘀𝗶 𝗦. 𝗘𝘅𝗮. 𝗠𝗶𝗻𝗶𝘀𝘁𝗿𝘂 𝗘𝗻𝘀𝗶𝗻𝘂 𝗦𝘂𝗽𝗲𝗿𝗶𝗼́𝗿, 𝗦𝗶𝗲́𝗻𝘀𝗶𝗮 𝗻𝗼 𝗞𝘂𝗹𝘁𝘂𝗿𝗮 𝗶𝗵𝗮 𝘀𝗲𝗿𝗶𝗺𝗼́𝗻𝗶𝗮 𝗴𝗿𝗮𝗱𝘂𝗮𝘀𝗮𝘂𝗻 𝗨𝗡𝗧𝗟 – 𝗜𝗡𝗙𝗢𝗥𝗗𝗘𝗣𝗘 𝗶𝗵𝗮 𝗥𝗔𝗘𝗢𝗔

𝑺𝒖𝒂 𝑬𝒙𝒆𝒍𝒆́𝒏𝒔𝒊𝒂 𝑷𝒓𝒆𝒛𝒊𝒅𝒆𝒏𝒕𝒆 𝑨𝒖𝒕𝒐𝒓𝒊𝒅𝒂𝒅𝒆 𝑹𝒆𝒋𝒊𝒂𝒖𝒏 𝑨𝒅𝒎𝒊𝒏𝒊𝒔𝒕𝒓𝒂𝒕𝒊𝒗𝒂 𝑬𝒔𝒑𝒆𝒔𝒊𝒂́𝒍 𝑶𝒆𝒄𝒖𝒔𝒔𝒆-𝑨𝒎𝒃𝒆𝒏𝒐 (𝑹𝑨𝑬𝑶𝑨)

𝑺𝒖𝒂 𝑬𝒙𝒆𝒍𝒆́𝒏𝒔𝒊𝒂 𝑽𝒊𝒔𝒆-𝑴𝒊𝒏𝒊𝒔𝒕𝒓𝒖 𝑬𝒅𝒖𝒌𝒂𝒔𝒂𝒖𝒏

𝑴𝒂𝒈𝒏𝒊́𝒇𝒊𝒌𝒖 𝑹𝒆𝒊𝒕𝒐́𝒓 𝑼𝑵𝑻𝑳

𝑷𝒓𝒆𝒛𝒊𝒅𝒆𝒏𝒕𝒆 𝑰𝒏𝒔𝒕𝒊𝒕𝒖𝒕𝒖 𝑵𝒂𝒔𝒊𝒐𝒏𝒂𝒍 𝑭𝒐𝒓𝒎𝒂𝒔𝒂𝒖𝒏 𝑫𝒐𝒔𝒆𝒏𝒕𝒆𝒔 𝒏𝒐 𝑷𝒓𝒐𝒇𝒊𝒔𝒔𝒊𝒐𝒏𝒂𝒊𝒔 𝑬𝒅𝒖𝒌𝒂𝒔𝒂𝒖𝒏 𝒏𝒊𝒂𝒏 (𝑰𝑵𝑭𝑶𝑹𝑫𝑬𝑷𝑬)

𝑫𝒊𝒓𝒆𝒕𝒐́𝒓 𝑬𝒅𝒖𝒌𝒂𝒔𝒂𝒖𝒏 𝑹𝒆𝒋𝒊𝒂𝒖𝒏 𝑨𝒅𝒎𝒊𝒏𝒊𝒔𝒕𝒓𝒂𝒕𝒊𝒗𝒂 𝑬𝒔𝒑𝒆𝒔𝒊𝒂́𝒍 𝑶𝒆𝒄𝒖𝒔𝒔𝒆-𝑨𝒎𝒃𝒆𝒏𝒐 (𝑹𝑨𝑬𝑶𝑨)

𝑹𝒆𝒑𝒓𝒆𝒛𝒆𝒏𝒕𝒂𝒏𝒕𝒆 𝑨𝒖𝒕𝒐𝒓𝒊𝒅𝒂𝒅𝒆 𝑳𝒐𝒌𝒂́𝒍 𝒔𝒊𝒓𝒂 𝒉𝒖𝒔𝒊 𝑹𝑨𝑬𝑶𝑨

𝑺𝒆𝒏̃𝒐𝒓𝒆𝒔 𝑷𝒓𝒐-𝑹𝒆𝒊𝒕𝒐𝒓, 𝑽𝒊𝒔𝒆-𝑹𝒆𝒊𝒕𝒐𝒓 𝒏𝒐 𝑫𝒆𝒌𝒂𝒏𝒖 𝒔𝒊𝒓𝒂 𝒉𝒖𝒔𝒊 𝑼𝑵𝑻𝑳

𝑺𝒆𝒏̃𝒐𝒓𝒆𝒔 𝑫𝒐𝒔𝒆𝒏𝒕𝒆, 𝒇𝒖𝒏𝒔𝒊𝒐𝒏𝒂́𝒓𝒊𝒐𝒔 𝒏𝒐 𝒆𝒔𝒕𝒖𝒅𝒂𝒏𝒕𝒆𝒔 𝒉𝒖𝒔𝒊 𝑼𝑵𝑻𝑳 𝒏𝒐 𝑰𝑵𝑭𝑶𝑹𝑫𝑬𝑷𝑬

𝑬𝒔𝒕𝒊𝒎𝒂𝒅𝒖 𝑮𝒓𝒂𝒅𝒖𝒂𝒅𝒖 𝒔𝒊𝒓𝒂,

𝑲𝒐𝒏𝒗𝒊𝒅𝒂𝒅𝒖𝒔, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐𝒓 𝒔𝒊𝒓𝒂 𝒎𝒂𝒌 𝒉𝒂𝒖 𝒓𝒆𝒔𝒑𝒆𝒊𝒕𝒖,

Ksolok boot ida mai ha’u hodi hahú ha’u-nia intervensaun ho aprezenta hau nia kumprimentus ba hotu-hotu ne’ebé marka prezensa iha serimónia graduasaun ida ne’e.

Ha’u hakarak hato’o kumprimentus espesiál ba Vise-Ministru Edukasaun, Magnífiku Reitór UNTL nian no ba Prezidente INFORDEPE no ba dirijente sira hotu, dosente no formadór sira husi instituisaun hirak ne’e.

Ha’u mós hakarak hato’o kumprimentus no fó parabéns ba finalista sira ne’ebé ohin simu graduasaun no mós ba sira-nia família sira ne’ebé partisipa mos iha eventu ida ne’e .

Graduasaun ne’e sai hanesan momentu importante ida ba instituisaun ensinu superiór. Maibé graduasaun ne’e sai espesiál liu tanba haree ba profesór sira Ministériu Edukasaun nian ne’ebé hetan asesu ba formasaun graduadu (baxarelatu) atu sira bele hetan susesu iha Karreira Dosente. Tanba ne’e, serimónia ohin nian hanesan pasu importante tebes ba komunidade akadémika ita-nia rai.

𝑬𝒙𝒆𝒍𝒆́𝒏𝒔𝒊𝒂, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐́𝒓 𝒔𝒊𝒓𝒂, 𝒎𝒂𝒌 𝒉𝒂’𝒖 𝒓𝒆𝒔𝒑𝒆𝒊𝒕𝒖,

Governu Konstitusionál ba dala ualu (VIII) nian entende katak komponente ida husi komponente sira ne’ebé estruturante liu iha misaun universidade públika nian mak atu kualifika sistema nasionál ensinu nian, liuliu nível pré-eskolár, primáriu no sekundáriu.

Atu bele halo ida ne’e efikás liután, liuhusi formasaun inisiál no kontínua ba profesór sira. Misaun ne’e sai nu’udar kondisaun esensiál atu sistema edukativu Timor-Leste nian bele hatu’ur metin no alkansa sistema edukativu foun sira ho kualidade.

Tanba ne’e ha’u hakarak hato’o parabéns ba Magnífiku Reitór UNTL nian no Prezidente INFORDEPE tanba investimentu ne’ebé halo ona iha formasaun ba profesór sira.

Serimónia ohin nian signifika katak UNTL no INFORDEPE, liuhusi kualifikasaun dosente sira nian ne’ebé hala’o hela serbisu iha RAEOA, fó ona kontributu esensiál ida atu Timor-Leste bele hala’o Objetivu sira husi Dezenvolvimentu Sustentável mak importante tebes, ne’ebé mak asegura edukasaun ho kualidade ba labarik no foin-sa’e sira hotu.

Área edukasaun nian mak sei kontinua la iha dúvidas katak ramun ka componente edukasaun nian importante hanesan integra iha universidade ida ne’e (UNTL). Ida ne’e atu reforsa tan katak, edukasaun ida ne’ebé inkluziva no ho kualidade hanesan dalan úniku hodi bele atinji dezenvolvimentu Nasaun ida ne’e nian.

Ha’u hakarak dirije liafuan balu ba estudante finalista sira. Serimónia ohin nian signifika katak, hafoin hala’o tiha estudu, dedikasaun no sakrifísiu sira, konsege hetan ona méritu no susesu iha imi-nia formasaun nia rohan.

Ha’u hatene katak la fásil atu serbisu hanesan profesór iha eskola no iha tempu hanesan hala’o mós estudu. Tanba ne’e, ha’u hakarak hato’o parabéns ba imi.

Ha’u mós hakarak hato’o felisitasaun ba graduadu sira nia família no belun sira, tanba vitória ne’ebé ohin imi hetan ho graduasaun ne’e la’ós de’it imi nian, maibé mós iha apoiu husi imi-nia familiá no belun sira.

𝑬𝒙𝒆𝒍𝒆́𝒏𝒔𝒊𝒂, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐́𝒓 𝒔𝒊𝒓𝒂, 𝒎𝒂𝒌 𝒉𝒂’𝒖 𝒓𝒆𝒔𝒑𝒆𝒊𝒕𝒖,

Mundu ne’e iha transformasaun boot no futuru ba país sira hotu sei sai diferente tebes ho situasaun atuál ne’ebé ita koñese ohin loron. Oras ne’e, Nasaun barak maka presiza duni perfil kompeténsia nian ba profisaun dosente.

Tempu uluk liu, atu sai profesór ba Ensinu Báziku presiza de’it iha formasaun nível médiu. Maibé, agora daudaun ne’e, iha Nasaun barak hili opsaun katak atu sai profesór tenke iha formasaun espesializada no iha nivel universitáriu no pós-graduasaun nian.

La’ós akontese de’it nune’e sein razaun ida, maibe tamba ohin loron ne’e ita hasoru ezijénsia no vida moris ne’ebé kompleksa liu fali buat ne’ebé antes.Bainhira ita hahú forma profesór sira ho nivel superiór ita aliña Timor-Leste ho mudança paradigma atuál internasionál nian. Ne’e di’ak.

Tanba Nasaun ne’e ezije atu profesór sira bele hetan oportunidade no konteúdu ne’ebé hato’o ba alunu sira no uza métodu hanorin nian ne’ebé fó motivasaun ba estudante sira atu aprende.Hanesan Paulo Freire, Edukadór no Filózofu brazileiru, hatete: “ser professor tem de ser um ato de amor, uma opção de vida e não apenas uma profissão que se exerce oito horas por dia” (sai hanesan profesór tenke sai hanesan hahalok domin nian ida, opsaun moris nian ida de’it no la’ós de’ it profisaun ida ne’ebé hala’o iha oras ualu nia laran”).

Koalia kona-ba asuntu ida ne’e, hau mos hakarak foti oportunidade atu reforsa liu tan katak ho Oitavu Governu Konstitusionál nia Mandatu, Ministériu Ensinu Superiór, Siénsia no Kultura servisu hamutuk Compact Development Team hodi asegura Programa Millenium Challenge Coorporation (MCC) nian hodi estabelese ‘Sentru Formasaun Exelénsia’ ne’ebe mak sei fó formasaun klean liu tan iha área literasia, numerasia, pedagojia, lideransa, língua, informasaun no teknolojia no sira seluk tan, hodi nune’e ita-nia sistema edukasaun bele adapta ho kurikulu sékulu 21 nian maka sempre utiliza teknolojia multimédia iha ensinu aprendijazen nian.

Ho ida ne’e, ha’u mos hakarak husu ba graduadu sira ohin loron nian ne’ebé sai nu’udar profisionál hodi adapta estratéjia pedagójika ne’ebé aprende iha Fakuldade Edukasaun atu bele hatán ba realidade alunu sira nian iha RAEOA.

Situasaun ne’ebé maka aprezenta profesór sira nu’udar ajente transformasaun pozitiva, hodi tulun komunidade atu komprende di’ak liután valór edukasaun nian ba futuru labarik sira nian. Ha’u mos rekomenda wainhira Sentru Formasaun Exelénsia loke ona, ita bo’ot sira bele kontinua hadi’a ita bo’ot sira-nia kbi’it liu husi formasaun ida ne’e ho nivel pós-graduasaun iha futuru, no bele kumpri padraun Rejional Asia nian no Padraun Internasionál.

Ha’u hein katak nu’udar profesór sira, uza hanoin poeta portugés Fernando Pessoa, ka bele dehan: “ponham o máximo de vocês no mínimo que fazem”(Hasai hotu imi-nia kbi’it máximu hodi bele hala’o buat ne’ebé mínimu).

Atu garante futuru ba sidadaun sira nian ne’ebé mai husi rezultadu dedikasaun no dezempeñu husi sira-nia profesór ensinu primáriu nian.

𝑬𝒙𝒆𝒍𝒆́𝒏𝒔𝒊𝒂, 𝑺𝒆𝒏̃𝒐𝒓𝒂 𝒏𝒐 𝑺𝒆𝒏̃𝒐́𝒓 𝒔𝒊𝒓𝒂, 𝒎𝒂𝒌 𝒉𝒂’𝒖 𝒓𝒆𝒔𝒑𝒆𝒊𝒕𝒖,

Tanba ohin loron ksolok ba imi, ha’u hakarak habadak no remata há’u nia intervensaun ida-ne’e, hodi hato’o dala ida tan parabéns ba UNTL no INFORDEPE tanba imi-nia kooperasaun no esforsu hodi reforsa investimentu ida ne’e konsentra ba formasaun inisiál no kontínua ba profesór sira, hodi tulun forma profesór sira ho kapasidade no kualifikasaun ne’ebé iha ona esperiénsia ensinu nian.

Ba Graduadu sira hotu ohin loron nian, ho haksolok ha’u hakarak kongratula ba imi hotu, ba imi-nia perkursu hanesan profesór no ha’u hein katak imi hotu bele kontribui atu forma diak liu tan estudante no sidadaun sira, ho objetivu atu asegura futuru ida ne’ebé sustentável liu ba ita-nia Nasaun.

Hanesan lema Ministériu Ensinu Superiór, Siénsia no Kultura nian hateten: A Qualidade da Formação é o Futuro da Nação (“Kualidade iha formasaun maka futuru Nasaun nian”).

Tanba ne’e, sai profesór hanesan oportunidade ida atu kontribui hodi muda ita-nia nasaun nia futuru liu hosi formasaun ba ita-nia rekursu umanu sira.

Obrigadu barak.