𝑫𝒊𝒔𝒄𝒖𝒓𝒔𝒐 𝒅𝒆 𝑺. 𝑬𝒙𝒂. 𝒐 𝑴𝒊𝒏𝒊𝒔𝒕𝒓𝒐 𝒅𝒐 𝑴𝒊𝒏𝒊𝒔𝒕é𝒓𝒊𝒐 𝒅𝒐 𝑬𝒏𝒔𝒊𝒏𝒐 𝑺𝒖𝒑𝒆𝒓𝒊𝒐𝒓, 𝑪𝒊ê𝒏𝒄𝒊𝒂 𝒆 𝑪𝒖𝒍𝒕𝒖𝒓𝒂 𝒏𝒂 𝒄𝒆𝒓𝒊𝒎ó𝒏𝒊𝒂 𝒅𝒆 𝒈𝒓𝒂𝒅𝒖𝒂çã𝒐 𝒅𝒐 𝑼𝑵𝑻𝑳

𝗘𝘅𝗰𝗲𝗹ê𝗻𝗰𝗶𝗮𝘀 𝗦𝗲𝗻𝗵𝗼𝗿𝗲𝘀 𝗠𝗲𝗺𝗯𝗿𝗼𝘀 𝗱𝗼 𝗣𝗮𝗿𝗹𝗮𝗺𝗲𝗻𝘁𝗼 𝗡𝗮𝗰𝗶𝗼𝗻𝗮𝗹

𝗘𝘅𝗰𝗲𝗹ê𝗻𝗰𝗶𝗮𝘀 𝗦𝗲𝗻𝗵𝗼𝗿𝗲𝘀 𝗠𝗲𝗺𝗯𝗿𝗼𝘀 𝗱𝗼 𝗚𝗼𝘃𝗲𝗿𝗻𝗼

𝗦𝗲𝗻𝗵𝗼𝗿𝗲𝘀 𝗘𝘅-𝗠𝗲𝗺𝗯𝗿𝗼𝘀 𝗱𝗼 𝗚𝗼𝘃𝗲𝗿𝗻𝗼 𝗮𝗾𝘂𝗶 𝗽𝗿𝗲𝘀𝗲𝗻𝘁𝗲𝘀

𝗠𝗮𝗴𝗻í𝗳𝗶𝗰𝗼 𝗥𝗲𝗶𝘁𝗼𝗿 𝗱𝗮 𝗨𝗡𝗧𝗟

𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀 𝗱𝗼𝘀 𝗣𝗮𝗿𝗰𝗲𝗶𝗿𝗼𝘀 𝗱𝗲 𝗗𝗲𝘀𝗲𝗻𝘃𝗼𝗹𝘃𝗶𝗺𝗲𝗻𝘁𝗼

𝗠𝗮𝗴𝗻í𝗳𝗶𝗰𝗼𝘀 𝗥𝗲𝗶𝘁𝗼𝗿𝗲𝘀 𝗱𝗮𝘀 𝗜𝗻𝘀𝘁𝗶𝘁𝘂𝗶çõ𝗲𝘀 𝗱𝗲 𝗘𝗻𝘀𝗶𝗻𝗼 𝗦𝘂𝗽𝗲𝗿𝗶𝗼𝗿 𝗮𝗾𝘂𝗶 𝗽𝗿𝗲𝘀𝗲𝗻𝘁𝗲𝘀

𝗦𝗲𝗻𝗵𝗼𝗿𝗲𝘀 𝗣𝗿𝗼-𝗥𝗲𝗶𝘁𝗼𝗿𝗲𝘀, 𝗩𝗶𝗰𝗲-𝗥𝗲𝗶𝘁𝗼𝗿𝗲𝘀 𝗲 𝗗𝗲𝗰𝗮𝗻𝗼𝘀 𝗱𝗮 𝗨𝗡𝗧𝗟 𝗦𝗲𝗻𝗵𝗼𝗿𝗲𝘀 𝗗𝗼𝗰𝗲𝗻𝘁𝗲𝘀, 𝗳𝘂𝗻𝗰𝗶𝗼𝗻á𝗿𝗶𝗼𝘀 𝗲 𝗲𝘀𝘁𝘂𝗱𝗮𝗻𝘁𝗲𝘀 𝗱𝗮 𝗨𝗡𝗧𝗟

𝗘𝘀𝘁𝗶𝗺𝗮𝗱𝗼𝘀 𝗘𝘀𝘁𝘂𝗱𝗮𝗻𝘁𝗲𝘀 𝗚𝗿𝗮𝗱𝘂𝗮𝗱𝗼𝘀,

𝗠𝗶𝗻𝗵𝗮𝘀 𝗦𝗲𝗻𝗵𝗼𝗿𝗮𝘀 𝗲 𝗠𝗲𝘂𝘀 𝗦𝗲𝗻𝗵𝗼𝗿𝗲𝘀,

Antes de mais, gostava de vos dizer que é com muita satisfação e honra que me encontro nesta cerimónia, não apenas enquanto Ministro de Ensino Superior, mas também em representação de Sua Excelência o Primeiro-Ministro que, por razões de agenda, não pôde participar neste evento.

Gostaria de começar por apresentar saudações a todos os que participam nesta cerimónia, nomeadamente ao Magnífico Reitor, à estrutura dirigente, aos docentes e estudantes da UNTL.

Quero ainda apresentar saudações e dar os meus parabéns aos estudantes finalistas que hoje recebem a graduação e também aos seus familiares aqui presentes.

A graduação é um momento importante para uma instituição de ensino superior, pois significa que a instituição soube criar condições para que, ao longo de quatro anos, os estudantes que hoje se graduam aprendessem e respondessem positivamente a todas as exigências académicas que lhes foram feitas.

Neste sentido, felicito a UNTL, nomeadamente o Magnífico Reitor, a estrutura dirigente, todos os docentes e funcionários, que tornaram possível a finalização do percurso académico de cada um dos estudantes que hoje se apresenta à graduação.

Exelénsia señora no señór sira, mak ha’u respeitu,

Ha’u hakarak felisita estudante graduadu sira hotu, ne’ebé iha tinan tolu ka haat nia laran liubá, hili tiha ona kursu iha universidade ida ne’e hodi hala’o sira-nia estudu no, hafoin ho empeñu no dedikasaun maka’as, sira konsege to’o duni formasaun nia rohan.

Tanba razaun ida-ne’e maka, ha’u fó parabéns ba finalista sira tamba manán ona etapa formasaun nian. Ho ida ne’e, sira prepara-an didi’ak ona atu kompete hodi tama iha merkadu traballu.

Ha’u hakarak aproveita oportunidade ne’e hodi fó omenajen ba finalista sira-nia família ne’ebé mak ohin marka prezensa iha ne’e, tamba, maske durante ne’e imi helik de’it iha kotuk, maibé imi mak garante ona kondisaun materiál no afetivu ba imi nia oan sira nian ne’ebé ohin hetan graduasaun. Ba ida-ne’e, vitória ne’ebé ohin komemora iha fatin ne’e, sai hanesan vitória ba imi hotu nu’udar família.

Serimónia graduasaun ne’e, hanesan mós vitória ida ba Timor-Leste, tamba kada joven ne’ebé mak hetan graduasaun no kompleta ninia formasaun, ita-nia rai Timor mós hetan kualifikasaun rekursus umanus atu bele hadi’ak ita-nia futuru, ne’ebé sei mai ho ezijénsia no dezafiu barak mak presiza tebes rekursus umanus ho kompeténsias.

Bainhira ha’u partisipa iha serimónia graduasaun, ha’u sente konvensidu liutan katak, juventude nu’udar rikeza boot Timor-Leste nian. Notísia di’ak ida maka, estudu demográfiku ne’ebé ita hatene publika ona, hatudu katak ita-nia populasaun barakliu mak joven sira.

Tanba ne’e, bazeia ba dadus ida-ne’e, ita iha razaun atu bele optimista ba ita-nia futuru. Maske ita-nia populasaun barakliu maka joven, sira-ne’e nu’udar de’it rikeza potensiál nian, tan reprezenta de’it oportunidade ida, maibé ida-ne’e signifika la’ós garantia ba rikeza no prosperiedade iha futuru. Atu dehan katak, hanesan hateten iha liafuan Filozofia, joven hanesan kondisaun nesesária, maibé seidauk sai nu’udar kondisaun sufisiente.

Exelénsia señora no señór sira, mak ha’u respeitu,

Atu transforma juventude potensiál sira ba forsa dezenvolvimentu Timor-Leste nian, ita presiza kontinua investe ho firmeza iha área edukasaun, iha kualifikasaun profisionál no kursu sira ne’ebé bele fó servisu ba ema ka kursu empregabilidade.

Empregabilidade husi kursu sira ne’e, sai nu’udar fatór importante ida tanba, tuir dadus husi Organizasaun Internasionál Traballu nian (OIT), ajénsia ne’ebé pertense ba Organizasaun Nasoins Unidas nian, “jovén ida husi jóven nain ne’en”, iha mundu, iha tinan 2021 la hetan servisu ka dezempregadu.

Grupu ka kamada juventude iha populasaun nia laran mak afetadu liu iha mundu, liuliu tambá mosu krize tolu hanesan tuir mai ne’e: krize sanitária, ne’ebé hamosu husi pandemia COVID-19, krize klimátika, ne’ebé hamosu dezastre naturál no katástrofe, no krize jeopolítika, ne’ebé mosu ho funu entre Rúsia no Ukrânia.

Nune’e, importante atu instituisaun ensinu superiór sira presiza hanoin kona-ba situasaun foin-sa’e sira no presiza mós iha sensibilidade kona-ba sira nia kursu ne’ebé mak fasilita sira tama iha merkadu traballu nian.

Oferta formasaun nasionál tenke tau atensaun ba tendénsia mundiál ba área formasaun hirak ne’ebé mak tenke fó valór a’as liu ba ohin no iha tempu oin mai, la’ós de’it iha Timor-Leste, maibé iha mundu tomak.

Subliña tan katak, nesesáriu tebes, liuhusi prosesu formativu, hahú husi kurríkulu rasik, Instituisaun Ensinu Superiór sira buka atu fó ka transmite kompeténsia sira ne’ebé permite sira-nia graduadu bele tama iha merkadu traballu nian.

Iha Karta Polítika Ensinu Superiór nian, ita define konseitu empregabilidade hanesan kapasidade potensiál husi ema ne’ebé graduadu ona bele integra iha merkadu traballu nian no bele iha karreira ida tamba hetan ona kbi’it no koñesimentu, valór no abilidade durante ninia perkursu akadémiku. Atu salienta de’it katak aspetu ida ne’e, tanba ita hanoin katak wainhira graduadu ida la hetan asesu ba serbisu, signifika investimentu ida ne’ebé halo ba kapasitasaun rekursu umanu ne’e durante nia perkursu akadémiku sai naben de’it ka gasta saugati de’it.

Ho liafuan seluk, atu dehan katak iha experiénsia ne’ebé mak akontese iha pasadu, lakon ka desperdísiu ba kapitál umanu sai hanesan tusan ne’ebé todan ba nasaun sira. Bazeia ba konsiénsia husi faktu ida ne’e maka VIII Governu Konstitusionál publika ona Dekretu-Lei Kurríkulu Padraun Nasionál Ensinu Superiór nian, hodi bele fó liña orientasaun sira kona-ba kompeténsia ne’ebé estudante sira presiza atu hetan iha siklu ka nível formasaun nian.

Nune’e mós, foin dadaun ne’e, ita implementa ona programa pilotu Estájiu Profisionál ba Mellór Graduadu sira, ne’ebé sei atu kontinua nafatin iha tinan 2023. Programa ida ne’e sai nu’udar baze ka embriaun iha inisíu hodi bele hamosu Programa Nasionál Estájiu nian iha futuru.Iha aspetu ida ne’e, importante tebes atu ita-nia universidade públika hametin ninia mekanizmu sira hodi bele asegura empregabilidade ba sira-nia graduadu, prinsipalmente liuhusi hametin relasaun ho entidade sira ne’ebé bele fasilita estájiu kurrikulár no profisionál sira.

Ohin loron fundamentál katak formasaun iha Instituisaun Ensinu Superior sira bele iha integrasaun entre “teoria no prátika” no mós entre “pensamentu no asaun”. Instituisaun ka Universidade ida atu hetan rekoñesimentu ka sertifikadu ba kualidade sira-nia formasaun, mak presiza asegura kualidade ba sira-nia garduadu bele hetan asesu ba merkadu traballu. Ita tenke halo buat hotu ne’e ho dedikasaun no paixaun ba foin-sa’e, hodi bele garante properidade moris di’ak ba futuru Timor nian.

Exelénsia señora no señór sira, mak ha’u respeitu

Molok atu remata, ha’u hakarak hato’o hau-nia mensajen espesiál ba alin graduadu sira. Imi presiza iha konsiénsia katak graduasaun ne’e importante tebes, maibé ida ne’e la’os dalan ikus liu iha imi nia formasaun, tamba, graduasaun ne’e loke perspetiva foun ba imi hodi iha posibilidade atu bele hakat liu tan ba oin no kontinua imi nia formasaun iha nível pós-graduasaun nian.

Iha mundu tomak, ema barak mak hakarak tama ikus liu iha merkadu trabalhu, tamba sira presiza tempu atu reforsa lai sira-nia kualifikasaun. Iha aspetu ida ne’e, notísia di’ak ne ‘e mak ita-nia Instituisaun Ensinu Superiór sira iha Timor-Leste, liuliu UNTL, hahú aumenta oferta kursu Mestradu nian, ne’ebé sei fó oportunidade ba imi atu kontinua aprende klean liu tan, nune’e wainhira imi remata, imi preparadu no iha koñesimentu klean hodi bele partisipa iha merkadu traballu.

Iha posibilidade seluk mak imi tama kedas iha merkadu traballu. Maibé imi presiza hatene katak profisionalizasaun iha imi nia servisu fatin sei ezije imi atu halo adaptasaun, kapasidade esforsu no disponibilidade atu kontinua aprende imi nia vida moris tomak.

Excelências, Minhas Senhoras e Meus Senhores

A chave do sucesso é “aprender a aprender” e nunca pensar que já aprenderam tudo na universidade. Por isso, faço um apelo para que sejam sempre ativos e pró-ativos na vossa vida profissional para conseguirem melhorar todos os dias. Por exemplo, o líder fundador da nação indiana, Mahatma Gandi, disse que: “o futuro depende do que você escolher fazer hoje” e também o político americano Abraham Lincoln escreveu que “a melhor maneira de prever o seu futuro é criá-lo”. Ou seja, o futuro de cada pessoa depende daquilo que fazemos agora e também de estarmos disponíveis para aprender continuamente.

Por ser hoje dia de festa, quero terminar desejando a todos os graduados as maiores felicidades pessoais e profissionais.

Muito obrigado.