𝐒. 𝐄𝐗𝐀. 𝐌𝐈𝐍𝐈𝐒𝐓𝐑𝐔 𝐌𝐄𝐒𝐒𝐊 𝐇𝐀𝐋𝐎 𝐕𝐈𝐒𝐈𝐓𝐀 𝐎𝐅𝐈𝐒𝐈𝐀𝐋 𝐁𝐀 𝐈𝐏𝐁

Betano, 28/06/2024: S. Exa. Ministru Ensinu Supérior, Siénsia no Kultura, Dr. José Honório, hamutuk ho ekipa halo vizita offisial ba iha Institutu Politekniku Betano, hodi kolia kona-ba futuro progressu no atualizasaun sistema IPB nian, ligadu ho prezensa Lei Base Ensinu Supérior No.5/VI/2024, ne’ebé mak hetan ona aprovasaun husi Parlamento Nasional, iha loron hirak liu ba.

Objetivu husi visita ida ne’e, atu hodi halo reuniaun ho Estrutura IPB nian, hodi kolia kona-ba futuru reforma ne’ebé mak presiza atu halo hodi hadia di’ak liu tan kualidade husi IPB nian, liu-liu administrativamente no jestaun ne’ebé mak iha relasaun ho programa IX Governu nian, ligadu mos ho prezensa husi aprovasaun Lei Base Ensinu Supérior nian ne’ebé mak, bele sai ona hanesan matadalan ida ba IPB mos, atu konfere sira nia nível grau estudu ne’ebé mak atualmente existe husi Diploma II ba iha Diploma III nian.

Iha Sesaun ida ne’e mos S. Exa. Ministru afirma mos kona-ba programa IX governu nian, ligadu ho investimentu ba iha Politekniku nian, atu bele kontribui ba reforsa setor Edukasaun iha rai laran nian, liu husi kontinua investe reforsa infraestrutura no mos kriasaun politekniku sira seluk hanesan Institutu Politekniku Lospalos, ne’ebé mak planea ona iha tempu besik sei Implementa.

Aleinde ne’e, Presidente Instituto Politekniku Betano, Dr. Acácio Cardoso mos informa, IPB rasik iha ona komisaun espesifika ida hodi hare kona-ba elaborasaun kurikuluk atu konfere Grau husi diploma II ba iha diploma III nian, ho nune’e, wainhira Lei Base Ensinu Supérior ne’e rasik promulga ona husi S. Exa. Presidente Republika maka, sira mos sei submete sira nia proposta atu hodi bele halo reforma ba Nivel grau estudu ne’ebé mak oras dau-dauk existe.

Iha sesaun ida ne’e, S. Exa. Ministru ho Ekipa mos halo, visita hodi observa direta prossesu konstrusaun ba Futuru Edifisiu Foun IPB nian, ne’ebé mak iha Fase Landscape nian, atinje ona 90%. No tuir plano, depois de fase landscape ida ne’e, iha fase tuir mai sei foku ba pake hotu ne’ebé mak sei inklui mos ho instrastrutura edfisiu no fasilidades sira hotu.