𝐒. 𝐄𝐗𝐀. 𝐌𝐈𝐍𝐈𝐒𝐓𝐑𝐔 𝐄𝐍𝐒𝐈𝐍𝐔 𝐒𝐔𝐏𝐄𝐑𝐈Ó𝐑 𝐄𝐍𝐒𝐄𝐑𝐀 𝐄𝐗𝐏𝐎𝐙𝐈𝐒𝐀𝐔𝐍 𝐒𝐂𝐈-𝐓𝐄𝐂𝐇 𝟐𝟎𝟐𝟒

Díli, 17/11/2024: Iha loron hirak liu ba, S. Exa. Ministru Ensinu Superiór, Siénsia no Kultura, Dr. José Honório, halo enseramentu ofisiál ba ativídade Expozisaun SCI-TECH 2024 ba sesaun daruak nian, ne’ebé realiza iha resintu Palásiu Prezidente Aitarak Laran, Díli.

Ministru Ensinu Superiór, Siénsia no Kultura, Dr. José Honório, iha nia intervensaun, hato’o agradecimentu ba ekipa no entidade sira hotu ne’ebé kolabora no hamutuk atu fó susesu ba ativídade ida ne’e. Ministru mos salienta katak: “Ohin loron, ita tama ona ba Séklu 21, área Siénsia no Teknolojia hanesan pilar rua ne’ebé importa teb-tebes iha mundu moderno ida ne’e. Se ita hakarak dezenvolve Siénsia no Teknolojia iha futuru, tenki hahu ho dezenvolve área importante rua refere.”

S. Exa. Ministru reforsa tan, dehan: “Liu husi Expozisaun ida ne’e, importante hodi aprejenta ba públiku katak Timor-Leste mos bele dezenvolve, liu-liu iha área Siénsia, Teknolojia no Inovasaun.”

Sesaun enseramentu refere remata ho ativídade oi-oin hanesan divertimentu no konserto muzikál ne’ebé harame sesaun daruak refere. Parte iha serimónia refere, reprezentantes husi Palásiu Prezidente, Instituisaun Ensinu Superior sira, estudante no profesór sira, funsionáriu no reprezentantes husi instituisaun relevantes sira.