𝐌𝐄𝐒𝐒𝐊 𝐇𝐀𝐋𝐎 𝐌𝐎𝐍𝐈𝐓𝐎𝐑𝐈𝐙𝐀𝐒𝐀𝐔𝐍 𝐁𝐀 𝐈𝐄𝐒 𝐏Ú𝐁𝐋𝐈𝐊𝐔 𝐍𝐎 𝐏𝐑𝐈𝐕𝐀𝐃𝐔 𝐈𝐇𝐀 𝐃𝐈𝐋𝐈

Dili, 27/02/2024: Ekipa téknika Diresaun Nasionál Ensinu Superiór nian hala’o monitorizasaun ba Instituisaun Ensinu Superiór (Públiku/Privadu) akreditadu sira iha munisípiu Dili hodi haree sira ida-idak ninia prosedimentu no funsionamentu.

Objetivu hosi atividade ida-ne’e atu haree IES sira-nia kondisaun oinsá hala’o prosedimentu administrativu sira no lala’ok hanorin nian atu nune’e bele hadi’ak liután sira-nia kualidade servisu.

Iha atividade ne’e ekipa halo tiha observasaun ba Instalasaun no ekipamentu sira-ne’ebé mak Instituisaun Ensinu Superiór sira iha, hanesan biblioteka no instalasaun hirak-ne’ebé uza hodi hanorin no apoiu iha instituisaun ida-idak. Iha vizita ne’e, ekipa haree-hetan problema balu nomós dezafiu hirak-ne’ebé ba oin bele rezolve. Ekipa mós rejista tiha dezafiu hirak-ne’e atu hamutuk buka solusaun hodi hadi’ak liután sira-nia kualidade.

Atividade ne’e ekipa halo ba fakuldade no departamentu sira hosi Instituisaun Ensinu Superiór sira hanesan, IPDC, ISFIT, JSI, ISC no UNDIL.

Tuir planu atividade hanesan sei halo ba Instituisaun Ensinu Superiór sira hotu iha Dili laran nomós munisípiu sira hotu.