𝐄𝐊𝐈𝐏𝐀 𝐌𝐄𝐒𝐒𝐊 𝐇𝐀𝐋𝐎 𝐒𝐎𝐑𝐔𝐌𝐔𝐓𝐔 𝐇𝐎 𝐈𝐍𝐒𝐓𝐈T𝐔𝐓 𝐏𝐀𝐑I𝐖𝐈𝐒𝐀𝐓𝐀 𝐓𝐑𝐈𝐒𝐀𝐊𝐓𝐈 𝐍𝐎 𝐔𝐍𝐈𝐕𝐄𝐑𝐒𝐈𝐓𝐀𝐒 𝐓𝐑𝐈𝐒𝐀𝐊𝐓𝐈 𝐈𝐍𝐃𝐎𝐍𝐄𝐒𝐈𝐀

Jakarta, 10 Juñu 2024: Ekipa husi Ministériu Ensinu Supérior, Siénsia no Kultura, ne’ebé kompostu husi delegasaun husi Timor-Leste no Gabinete adidu Edukasaun destakadu iha Indonesia, halo sorumutu ho Institutu Pariwisata Trisakti no Universidade Trisakti, iha Jakarta Indonesia.

Objetivu husi atividade ida ne’e, atu hodi halo diskusaun tekniku sira kona-ba kooperasaun ne’ebé mak sei estabelese ho Instituisaun sira ne’e, liu-liu ba area sira hanesan kapasitasaun rekursu umanu, interkambius, ofertas Bolsa de Estudo no oportunidades de estudu sira seluk, ne’ebé sei oferese ba iha Timor-Leste no mos Instituisaun Ensinu Supérior sira iha Timor, hodi bele mellora diak liu tan kualidade Ensinu Supérior iha Timor-Leste no kontribui mos ba iha Desenvolvimentu capital humanu ne’ebé sustentável.

Iha soprumutu ho Institutu Pariwisata Trisakti ne’e, halao diskusaun hodi kolia kona-ba assuntu tekniku sira ne’ebé mak relevansia ho turismo nian, atu hare ba possibilidade kooperasaun hodi apoiu Timor-Leste, liu-liu ba kooperasaun servisu hodi apoiu ba estabelesimentu Instituto Politekniku Lospalos (IPL), ne’ebé mak defini ona iha planu Estratejiku Desenvolvimentu Nasional (PEDN), iha tempu besik sei estabelese, ofertas bolso estudo ba area turismo nian, no apoio kapasitasaun no kooperasaun ba iha Intituisaun Ensinu Supérior sira iha Timor-Leste, hanesan interkambius no servisu seluk tan. Instituto ne’e rasik mos, hanesan Instituisaun ida ne’ebé iha potensia diak kona-ba Jestaun Turismo no boas pratikas sira iha area turismo nian, ne’ebé maka ho nia popularidade no konhesidu ona iha ASEAN.

Portanto, iha tempo hanesan ekipa mos halo sorumutu tekniku ho Universidade Trisakti Indonesia, ne’ebé mak ho nia espesialidade foku ba iha area engeñaria nian, hodi deskuti kona-ba futuru kooperasaun iha area kapasitasaun rekursu umanu nian, ne’ebé ho nia foku ba iha area engeñaria nian, liu husi ofertas bolso estudu ne’ebé mak sei oferese husi Instituisaun Ensinu Supérior refere mai Timor-Leste.

Delegasaun Timor-Leste ne’ebé mak hola parte iha asorumutu hirak ne’e kompostu husi, Coordenador Unidade Parseria no Kooperasaun – MESSK, Sr. Paulo Mariano, hamutuk ho Adidu Edukasaun no Assitente, ne’ebé mak akompañadu husi Assesor Nasion, Sr. Joel Salsinha, no Sra. Dalia Suzana, inklui Jestor Projeto – MESSK, Sr. Helio Domingos.