Díli, 16 Marsu 2026 — Sua Excelénsia Ministru Ensinu Superiór, Siénsia no Kultura, Dr. José Honório, prezide serimónia ofisiál asinatura Akordu Transferénsia Patrimóniu Millennium Challenge Account Timor-Leste (MCA-TL) ba Ministériu Ensinu Superiór, Siénsia no Kultura (MESSK), ne’ebé hala’o iha Salaun Ministériu nian, iha Colmera, Díli.
Serimónia ida ne’e reprezenta momentu importante atu formaliza prosesu transferénsia patrimóniu hosi MCA-TL ba MESSK. Akordu ne’e sei permite patrimóniu sira ne’ebé uluk utiliza iha programa no atividade sira husi MCA-TL atu transfere ofisialmente ba Ministériu, hodi asegura kontinuidade utilizasaun ba apoiu atividade institusionál sira.
Transferénsia rekursu sira ne’e sei kontribui atu fortalese inisiativa no projetu sira Ministériu nian, liu-liu iha área ensinu superiór no siénsia, hodi apoia dezenvolvimentu no fortalese kapasidade institusionál iha Timor-Leste.
Serimónia ne’e hetan partisipasaun hosi S. Exa. Vice-Ministra Finansas, dirijente no reprezentante sira husi instituisaun rua, funsionáriu no tékniku sira.
Média / URP – MESCC
……………………
