by 
Díli, 04/12/2024: Iha loron hirak liu ba, Ministériu Ensino Superior, Ciência no Cultura (MESCC), liuhusi Direção-Geral Ensino Superior no Ciência (DGES), realiza atividade Kompetisaun “Olimpiade Koñesimentu”, ba estudante husi Instituisaun Ensino Superior (IES) sira. Kompetisaun ne’e realiza iha Fundação Oriente, durante loron tolu (3), hahú husi loron 2 to’o 4 Dezembru 2024.
Programa ida ne’e hanesan continuidade husi atividade SCI-TECH 2024, ne’ebé mak iniciativa ida husi S. Exa. Prezidente da República, Dr. José Ramos-Horta, ho nia objetivu hodi promove Turismo iha Timor-Leste. Programa ne’e inklui mos área sira hanesan ciência, tecnologia no inovação, ne’ebé mak dirijidu ba públiku no mos ba instituisaun sira iha setor kapasitação rekursu umanu nian. Objetivu principal husi programa Olimpiade ida ne’e mak atu aumenta kapasidade no conhecimentos científicos Estudantes Universitárius sira iha área Ciência no Tecnologia nian.
Iha âmbitu programa ida ne’e, MESCC iha kolaborasaun servisu hamutuk ho Gabinete Palásiu Prezidente da República nian, durante prosesu implementasaun atividade refere nian.
Total konkorrente ne’ebé mak partisipa iha Kompetisaun ne’e mai husi Instituisaun Ensino Superior (IES) sira, total nain sia (9), no matéria ba kompetisaun refere mak hafahe ba área rua (2), hanesan área Direitu no área Economia. Numeru total konkorrente sira mak nain 39, ne’ebé partisipa durante kompetisaun loron tolu (3) refere nian.
Portanto, observadór sira ou júri ba Olimpiade ne’e mai husi formadór sira husi Departamento Formasaun MESCC nian, ne’ebé mak lideradu husi Coordenadora Departamento nia, Sra. Suzana Mendonça, hamutuk ho nia ekipa.
