EKIPA MESSK PARTISIPA LORON ANIVERSARIO MISAUN INTERFET BA DALA 25

Díli, 14/09/2025: Ekipa husi Ministériu Ensinu Superiór, Siénsia no Kultura, lideradu husi S. Exa. Minstru, Dr. José Honório, hamutuk ho kargus dirijentes no funsionárius sira husi MESSK, partisipa iha atividade Marsa ba ambitu komemorasaun loron Aniversariu Misaun Forsa Internasional Paz (INTERFET) nian iha Timor-Leste ba dala 25, ho nia rute hahu husi Porto Díli to iha Palasiu Prezidente Aitarak Laran, Díli.

Atividade ne’e hanesan meus ida atu fo homenagem ba prezensa husi INTERFET nian, ne’ebé mak kontribui ona ba Timor-Leste nia perkursu ukun rasik an nian, hafoin anunsia sai rezultadu Konsulta Popular iha Fulan Setembro 1999. Sesaun atividade ne’e, kobre ho atividade oi-oin, hanesan Marsa lao ain, aprezentasaun konsertu muzikal no mos atividade sira seluk, ne’ebé realiza iha resintu palasiu Prezidente nian.

Hola parte iha, S. Exa. Prezidenti da Republika Dr. Jose Ramos Horta, S. Exa. Primeiro-Ministru, Kay Rala Xanana Gusmao, Jeneral Piter Cosgrow ho Nia Membru, Xefe Estadu Mayor (FFDTL) komandante Falur Rate Laek, komisiris (PNTL), Membru governu sira, Korpus diplomatikus, funsionarius estadu sira no mos partisipantes husi instituisaun relevantes sira seluk.