by 
Dili, 30/07/2024: Ministériu Ensinu Superiór, Siénsia no Kultura, lui husi Komisaun Koordenadora Universidade no Institutu Superiores (CUIS – Sigla Portugés), realiza reuniaun ordinária ho membru CUIS ba dala VII, iha Salaun enkontru Ministeriu Ensinu Superior Colmera- Dili, hodi atualiza progresu implementasaun Orsamentu Subvensaun Públika Governu nian ne´ebé alokadu ona ba IES Privadu sira.
Objetivu prinsipal husi sorumutu ne´e maka atu aprezenta no atualiza informasaun konabá lalaok Inplementasaun Orsamentu Subvensaun Públika Governu nian ne´ebé mak fo apoiu ba IESP sira ho montante orsamentu $5.000.000 (Tokon Lima Dolares Amerikanu), to´o fulan jullu ne´e nia laran MESCC halo ona transferensia ba dahuluk hamutuk 40% husi orsamentu refere ba Instituisaun Ensinu Superior Privadu sanulu resin hitu (17).
Aliende ne´e mos KUIS prepara membru sira hodi fahe ba ekipa ha´at, hodi servisu hamutuk ho ekipa Tékniku sira husi Ministeriu Ensinu Superior ne´ebé sei Lidera husi Direktur Jerál Planeamentu no Finansas Sr. Hernani Viterbo da C. Soares, atu halo Monitorizasaun no Verifikasuan ba ezekusaun orsamentu ne´ebé oferese ba Instituisaun Ensinu Superior Privadu sira hodi ezekuta no implementa tuir proposta ne´ebé iha. Orsamentu hirak ne´e sei uza hodi hola material eskritoriu, ekipamentu Laboratorium, no mos fó apoiu ba iha Estudantes no Dosente sira, hodi partisipa iha treinamentu no formsaun tekniku sira.
Hola parte iha sesaun refere, lidera direta husi S. Exa. Ministru Ensinu Superiór, Siénsia no Kultura, Dr. José Honório, Xefe Gabinete MESSK, Sr. José Boavida Simões, Diretor Jeral Planeamentu no Finansas, Sr. Hernâni Viterbo da Costa Soares, Diretor Jeral Ensinu Superiór no Siénsia, Sra. Maria Filomena Lay Guterres, Koordenador CUIS, Dr. Edmundo Viegas, Dr. Acacio Amaral, Dr. João Cancio no Ekipa Tékniku husi CUIS.
