by 
Díli, 09/07/2024: Ekipa husi Diresaun Jeral Ensinu Superiór no Siénsia, ne’ebé mak kompostu husi Diresaun Nasional Kurrikulu Ensinu Superiór (DNCES – Sigla Portugés), no Komisaun Koordenadora Universidade no Institutu (CUIS – Sigla Portugués), realiza Workshop formasaun ba Kurrikulu Padraun Nasional Ensinu Superiór ba Peritus sira ne’ebé mak halo hela revisaun ba dokumentus tékniku sira no mos funsionárius téknikus sira husi DNCES rasik, iha Sala reuniaun MESSK, durante loron ida nia laran.
Sesaun loron ida ne’e, realiza ho nia objetivu atu fo formasaun rápida ida ba peritus nasional sira iha setor saúde no edukasaun, kona-ba oinsa atu halo revisaun ba dokumentus tékniku sira ne’ebé mak ministériu produz ona, liu-liu ba iha area sira hanesan, Medisina, enfermazem, farmasia no mos area edukasaun hanesan físika no seluk tan. Sesaun workshop ida ne’e, aproveita mos ho orientasaun ne’ebé mak oferese husi Prof. Dr. Hazman Shah Abdullah husi Malasia, ne’ebé mak hanesan professor experiente iha setro ensinu superior nian, liu-liu ba area kurrikulun no sistema kualifikasaun nian, hodi kontribui liu tan atu hasae peritus sira nia abilidade hodi halo revisaun ba dokumentus sira ne’ebé mak mensionadu ona.
Portantu, Sesaun workshop refere hafahe ba iha, parte rua (2) dader no lokraik, iha Sesaun dader ne’ebé mak oferse ba iha peritus revisor sira, no iha sesaun lokraik, oferse direta ba iha téknikus no funsionárius sira husi Diresaun Nasional Kurrikulu Ensinu Superiór nian. Ne’ebé mak ho nia foku liu-liu hodi hare ba iha prosesu implementasaun kurikulu padraun nasional nian, ne’ebé mak agora dau-daun peritus sira halo hela revisaun ba dokumentus téknikus sira tuir rekezitus ne’ebé mak defini ona ba kada kursu no nível estudu sira, hodi aliña ho padraun kualifikasaun Nasional nian.
Sesaun ida ne’e, loke direta husi Diretora Jeral Ensinu Superiór no Siénsia, Sra. Maria Filomena Lay Guterres, ne’ebé mak akompañadu husi Koordenador CUIS, Dr. Edmundo Viegas, konvidadu Espesia Prof. Dr. Hazman Shah Abdullah, no partisipa husi Peritus no téknikus sira husi Ministériu rasik.
