𝐌𝐄𝐒𝐒𝐊 𝐇𝐀𝐋𝐎 𝐒𝐎𝐑𝐔𝐌𝐔𝐓𝐔 𝐇𝐎 𝐄𝐒𝐓𝐑𝐔𝐓𝐔𝐑𝐀 𝐔𝐍𝐈𝐕𝐄𝐑𝐒𝐈𝐃𝐀𝐃𝐄 𝐌𝐄𝐑𝐂𝐔 𝐁𝐔𝐀𝐍𝐀 𝐈𝐍𝐃𝐎𝐍𝐄𝐒𝐈𝐀

Jakarta, 13 Juñu 2024: Ekipa Ministériu Ensinu Supérior, Siénsia no Kultura, lideradu husi Koordenador Unidade Parseria no Kooperasaun, Sr. Paulo Mariano, hamutuk ho Adidu no Assistente Adidu Edukasaun MESSK iha Indonesia, ne’ebé akompaña mos husi tekniku sira husi Ministériu rasik, halo sorumutu ho estrutura Universidade Mercu Buana, iha Jakarta Indonesia.

Objetivu husi sorumutu ida ne’e, hodi responde ba pedudu ne’ebé mak Instituisaun ne’e hato’o ba MESSK, liuhusi Gabinete adidu edukasaun ne’ebé mak kolokadu iha Indonesia, ne’ebé mak demostra nia interrese hakarak atu kria kooperasaun ho Timor-Leste, atu apoiu iha area kapasitasaun rekursu humanu, liuhusi oferta oportunidade Bolsu Estudu ba iha Timor oan sira atu kontinua sira nia estudu iha universidade refere iha nível Lisensiatura, Mestrado no Doutoramentu, ba iha area sira hanesa Bussines Management, Lingua Estrangeira, Bussines Internasional no area sira seluk.

Prosesu ba impelementasaun bolso estudu sira ne’e, rasik nia prossesu de rekrutamentus no administrativas sei realiza no prossesa liuhusi Ministériu Ensinu Supérior, Siénsia no Kultura rasik.

Aleinde ne’e, Universidade refere mos demostra nia interrese, atu ho kooperasaun ho MESSK, bele sai hanesan fonte ida, hodi bele estabelese mos kooperasaun servisu ho Instituisaun Ensinu Supérior sira iha Timor-Leste nia, liu-liu ba iha area sira hanesan kapasitasaun rekursu umanu, peskiza no seluk tan ne’ebé mak sei establese tuir necessidade husi kooperasaun entre referente Universidade ho Instituisaun Ensinu Supérior sira iha Timor-Leste.

Portantu, atividade sorumutu tekniku ida ne’e, hanesan atividade kontinuasaun husi Misaun servisu Ekipa tekniku delegasaun MESSK nian, ne’ebé mak halao iha Indonesia hodi bele hare ba possibilidades sira ba kooperasaun ne’ebé bele apoiu no kontribui ba reforsa kualidade sistema Edukasaun Ensinu Supérior, iha Timor-Leste nian.